Latest News

MZP ten Mizoram leh Assam inrina hmun tlawhin COVID-19 laka sawrkar hmalakna an enfiah

MZP General Hqrs. hruaitute chuan nimin khan Bairabi, Vairengte leh Phaisen te tlawhin tunlai hrileng hlauhawm COVID-19 laka kan ram a him theihna tura Duty-te hmalak mekna leh he hrileng laka Mizoram kan himna tura sawrkar hmalakna hrang hrangte an enfiah. 

MZP General Hqrs. chuan COVID-19 hrileng mek laka Mizoram mipuite kan him theih nana Village Level Task Force (VLTF) duty na hmun hrang hrang leh VLTF hruaitute tlawhin an kawmkual thu leh Duty ten an mamawh hrang hrang leh an hmalak dan an ngaihthlak thu sawiin, he hripui laka kan ram himna tura nasa taka venhim hna thawh mekah hian State pawn atanga Mizoram luhruk tum engemaw zat an la awm nia an hriat thu leh hemi veng tur hian sawrkar lam atangin Force dah belh thei se an duh thu an lo sawi tih an sawi a. Mihring lut chhuak endikna tur hmanrua leh a invenna, Personal Protective Equipment (PPE) tam zawk leh tha zawk ramri hrul duty post hrang hrangah hian dah belh se an duh thu an sawi bawk.
Hei bakah hian ramri hrula Village Level Task Force duty-te hian Mizoram daido an nih avangin an khua leh a chhehvel tan mai ni lo, Mizoram himna tura duty an nih angin Mizo mipuite chu duty te thu ngaichang tur leh kaltlang tuma duty te nawrlui tawh lo turin an ngen tih MZP chuan an sawi a, ramri hrul-a duty tur sawrkar in dah belh thuai se an duh takzet thu an lo sawi bawk niin an sawi.
MZP hian COVID-19 hrileng laka Mizo mipuite kan him theih nana thawktute chhuan-awm an tih thu leh an hmalakna ah lawmawm an tih thu sawiin, he natna laka ram mipuite kan himna turin tlawmngaih chhuaha duty zel turin an ngen a. Heng ramri hrula duty post hrang hrang te hman tur Surgical Mask, Glove leh Hand Sanitizer a hlan nghal bawk.
MZP chuan he hrileng laka Mizoram mipuite kan him zel theihna turin Mizoram leh State dang inkalpawhnaa mipui mamawh phurtu Motor lut leh chhuak reng reng sanitize tur te, lirthei enkawltute himna tura kutkawr emaw, an himna tur an mamawh ngaihtuah sak thuai tur leh Medical Duty tha zawk dah turin sawrkar a ngen a. Ramri hrul ah Force mi te pawh indaih zawka duty thei tura ruahmanna siam thuai turin sawrkar an ngen bawk.

Comments

Popular News (Last 30 Days)