CM Relief Fund hman dan tur ngaihtuahin thukhawm

Chief Minister’s Relief Fund hman dan tur ngaihtuahtu atana din, Committee on Utilization of Chief Minister’s Relief Fund for COVID-19 chu nimin khan an Chairman Chief Secretary, Lalnunmawia Chuaungo hova thukhawmin CM Relief Fund hman dan tur an rel.
Chief Secretary’s Conference Hall, Aizawl-a Committee on Utilization of Chief Minister’s Relief Fund for COVID-19 thutkhawm vawi 3-na hian Mizoram-a Village leh Local Level Task Force 893 te hnenah sum in zat theuha semchhuah an lo rel tawh chu ennawnin, khua leh Veng-a mipui cheng zat a zir te, duty-te mawhphurhna hautak zual bik te leh ramri depa khaw awm te thurchhuakin heng hi Category pali - A, B, C leh Special Category-ah an then a. CM Relief Fund atanga sum an dawn zat tur hi an mamawh dan a zirin a danglam dawn a ni. LLTF leh VLTF te hnena sum semchhuah tur belhkhawm hi Rs. 2,04,85,000/- a ni a. Meeting hmasaa lo rel tawh angin Home leh Centre hrang hrangte hnenah cheng nuai 23.65 pek a ni ang a, BSUP (Basic Services to Urban Poor)-a cheng chhungkua te tan cheng nuai ruk sem a ni anga. Heti hian CM Relief Fund atanga COVID-19 dona sum sem chhuah tur zat hi Rs. 2,34,50,000/- a ni.
Hei bakah hian District tina DC theuhte chu thil pawimawh zual bikah CM Relief Fund atang hian tanpuina an dil theih tura rel a ni a, tanpuina an dil dawn a nih chuan report chiang tak nen chhan fel taka ziakin an thlen a ngai dawn thung a ni.

Comments

Chhiar Hlawhte