ZMC-a COVID-19 Testing Laboratory hman tan a ni

Nimin-a Test 14 zingah positive an la awmlo

Zoram Medical College (ZMC)-a COVID-19 Testing Laboratory chu nimin atang khan hman tan theih a ni ta tih Health Minister, Dr. R. Lalthangliana chuan sawiin, nimin khan a hmasa ber atan Mizoram-a COVID-19 vei enkawl mektu mi 14 te Nasopharyngeal Swab Test neih tan nghal a ni.

Health Minister, Dr. R. Lalthangliana hian nimin khan thuthar thehdarhtute hnenah Falkawn-a Zoram Medical College (ZMC)-a COVID-19 Testing Laboratory chu nimin atang khan hman tan theih a nih tak thu hi sawiin, a hmasa ber atan COVID-19 vei Mizoram in neih enkawl mektu mi inpe - Doctor, Nurse leh Healthcare Worker mi 14 te Nasopharyngeal Swab Test a nih thu leh anni bakah hian Low Risk damlo pakhat chu test a nih thu a sawi a, heng zinga mi 11 te result hi nizan khan hriat nghal niin an Negative vek a, Vawiin ah midang te hi test zui an ni ang.

Health Minister chuan a hmaa Mizoram in Sample kan test-na thin Silchar lamah COVID-19 case a lo awm ve tak nual hnuah Silchar lam tihbuai ngai lova keimahni puala Testing Laboratory kan nei thei ta chu a hun takah Pathian in min peihsak nia a hriat thu sawiin, Testing Kit pawh 1000 lai Dibrugarh atangin chah thlen a nih thu a sawi a. Nimin-a World Health Day takah he COVID-19 test-na khawl peihfel a ni chu a lawmawmin a inhmeh hle tih a sawi bawk.

Dr. R. Lalthangliana chuan Mizoram-a COVID-19 vei enkawl mek dinhmun a tha tih pawh sawiin, ani bak test neih tawh dang zawng zawng a la negative vek rih thu a sawi a. COVID-19 Testing Laboratory chu a hranpa in hawnna programme siam a nih loh thu leh Mizoram Kohhran Hruaitu Committee (MKHC) hruaitu thenkhat leh tawngtai mite’n Pathian hnenah an awmhmun atangin an hlan thu a sawi a. Laboratory-a thawktute leh COVID-19 vei mek tan Zoram mipuite tawngtai chhunzawm zel turin a ngen a. Mizoram chhehvel Assam leh Tripura-ah COVID-19 vei hmuhchhuah an nih tak zel avangin ramri ven fimkhur a ngai zual hle tih sawrkarin a hria a, hemi atan hian theihtawpa inzarhpharhin hma an la mek tih a sawi bawk.

COVID-19 veite puala Zoram Medical College tih ruah a nih tak avangin Aizawl Civil Hospital leh Private Hospital dangte’n nasa takin an buai phah tih sawrkarin a hriat thu leh an inpekna ah an lawm thu Health Minister chuan a sawi a, COVID-19 test-na khawl kan neih theihna tura hmalatu Core Committee leh COVID-19 vei mek enkawl tura inpe te chungah lawmthu sawiin, ZMC in tun dinhmun a thlen theihna tura sawrkar hmasa in hma an lo lak avangin lawmthu a sawi a. COVID-19 dona kawnga rim taka thawktu zawng zawngte chungah leh Zoram Medical College staff zawng zawngte chungah lawmthu a sawi bawk a ni.