Mumbai Mizoram House-a awm zingah COVID-19 vei mi 3 hmuh belh an ni

Mumbai-a Mizo damlo enkawl mek pakhat chu COVID-19 a kai tih hmuhchhuah a nih avanga Mizoram House Dormitory-a awmte leh Cancer vei midangte Nasopharyngeal Swab Sample Test neih ah midang pathum chuan COVID-19 an kai tih hmuhchhuah leh a ni a, heng mite hi COVID-19 enkawlna damdawi In, Seven Hills Hospital-ah dah nghal an ni.

Hemi chungchanga Mizoram sawrkar thuchhuah siamin a tarlan danin April 13, 2020 khan TATA Memorial Hospital-a inenkawl mek Mizo damlo chu COVID-19 a vei tih hmuhchhuah a nih avangin Brihanmumbai Municipal Corporation hmalakna in Health lama thawktuten COVID-19 vei hmuhchhuah tak awmna, Mizoram House Dormitory-a awmte leh Cancer vei midangte Nasopharyngeal Swab Sample 20 chu enfiah turin an la a. Sample test result hi nimin khan hriat niin mi pathum (3) in COVID-19 hi an vei tih hmuhchhuah a ni a. Heng positive hmuhchhuah tharte hi mipa pahnih (2) leh hmeichhe pakhat (1) niin Cancer vei pahnih leh anmahni awmpuitu pakhat an ni.
He chanchin hi hriat a nih veleh Mizoram Sawrkar Health Minister, Dr. R. Lalthangliana chuan nimin vek khan Maharastra Sawrkar-a Health Minister, Rajesh Ankushrao Tope chu Phone-a be nghalin heng damlo hmuhchhuah thar pathum te hi a rang thei ang bera buaipui turin a ngen a, he ngenna hi ngaipawimawhin COVID-19 enkawlna damdawi In, Seven Hills Hospital-ah dah nghal an ni a, tun dinhmunah insawiselna leh harsatna an nei lova, COVID-19 symptom pawh a lang lo a ni. Mumbai Mizoram House-a thleng zawng zawng zinga sample la test loh pawh a rang thei ang berin test an ni ang.
Health Minister Dr. R. Lalthangliana chuan Mumbai Mizoram House-a awmten he natna an kai chiah hi hriat a ni lo tih sawiin, a vei hmuhchhuah hmasak ber kha a kaidarhtu a ni tih finfiahna engmah a awm lova, chutiangin midangte aiin amah-ah a natna a langchhuak hmasa mai zawk te pawh a ni thei tih mipuite pawhin an hriat a tul thu a sawi a. Mi rilru ti na thei tur zawnga Social Media leh hmundangah tawngkam hmang lo turin mipuite a ngen a, COVID-19 vei te hming, thlalak leh an nihna tilang thei thil Social Media leh thildangah thehdarh lo turin mi zawng zawng a ngen bawk.
Health Minister chuan Mumbai-a Mizo-ram mi COVID-19 vei hmuhchhuah hmasak ber pawh tun dinhmunah a tha zel tih sawiin, a khawsik pawh damdawi In a luh hnuah a awm tawh rih lova, a khuh pawh a zia bakah a Awm pik te a zangkhai a, Zan mut that theihloh pawh a nei rihlo tih a sawi a, ICU-a dah ngai lovin General Ward-ah a awm thu leh a pasal pawh test a negative thu sawiin, tunah hian Salvation Army Red Shield Hostel-ah a awm mek thu a sawi bawk.

Comments

Chhiar Hlawhte