Chanchin thar thenkhat :

Champhai DC sawn duh

Champhai Sub-Hqrs. YMA chuan nimin khan Executive Committee thutkhawm neiin CO-VID-19 laka mipuite an fihlim theihna tura hma an lakna kal mekah Champhai District Bawrhsap, Naveen SL, IAS chu mipuite thlavang hauh zo lo leh mipuite thlamuanna tur kawnga thawhpui theih loh nia hriain sawnchhuah a nih theih nan hmalak nise an ti a, State dang atanga Essential Commodities phur lirthei driver te Mizoram a lo lut tawh lo tura hma lak nise an ti bawk.
Hetihlai hian nimin khan Mizoram sawrkar chuan Champhai DC, Naveen SL, IAS chu Secretariat Administration Department (SAD)-ah Officer on Special Duty (OSD)-a awm turin a sawn a, Champhai Addl. DC nilai mek, Mark Lalthanliana chu DC mawhphurhna la zui tura ruat nghal a ni bawk.

Venhimna hna thawk zel dawn
New Ngharchhip VCP, J. Lalropuia chuan COVID-19 dona kawnga hmalak kal zelah Village Level Task Force te mamawh phurhurukna tura Chief Minister's Relief Fund hman dan tur reltu, Utilization of Chief Minister's Relief Fund on COVID-19 in an khua Category C-ah an dah chu an lungawilo hle tih a sawi a. Road Block leh Check Gate an siam te pawh lungawilohna lantirna atana tihtawp an tum chungchang chu sawrkar hotute ngenna avangin dan pangngaia an kalpui chhunzawm leh dawn thu sawiin, he an lungawilohna hi Hnahthial DC pawhin thuneitu sang zawkah a thlen nia thudawn a ni bawk.

Ramri-a duty te sem
Mualvum-a awm 1st IR Battalion te chuan nimin khan Kolasib District huamchhunga Mizo-ram leh Assam ramri dep-a duty, anmahni mi leh sa bakah Bairabi Hmar Veng, Bairabi Chhim Veng, Zophai, South Chhimluang, North Thing-lian, Phaisen, Vairengte, Saiphai leh Saipum Local Task Force te hman turin Silpauline leh Torchlight an sem a, Torchlight hi an Battalion sum-a an lei niin 43 zet an sem a, Silpauline 20 an sem bawk.

Lawngtlai District-ah tanpuina semchhuak
Lawngtlai District chhunga mi tlawmngai te chuan tunlai-a hri leng avanga inkharkhip mek pualin Central Young Lai Association-ah Rs. 9,94,300/- zet an thawhkhawm tawh a, heng sum thawhkhawm hmang hian CYLA chuan nitin mamawh zualpui Buhfai leh chawhmeh bakah thildang te leikhawmin, heng te hi Lawngtlai District chhung hmun hrang hrangah tunlai hian semchhuah mek a ni.

Mizoram dinhmun thar ber
Nimin tlai thleng khan Mizoram-ah CO-VID-19 kaihhnawih avangin mi 66,006 te chu endik ni tawhin mi 2449 te chu In lama khung-hran tura tih niin sawrkar in hmun a siam ah mi 238 te khunghran an ni tawh bawk a. Mi 89 te sample la-a enfiah ni tawhin heng atang hian COVID-19 vei hmu 1 hmuhchhuah a ni tawh bawk. Hetihlai hian COVID-19 kai rinhlelh mi 20 te chu damdawi In-ah dahluh ni tawhin mi 19 te chu damdawi In atang hian chhuahtir an ni leh tawh a, COVID-19 vei enkawl lai mi pakhat a awm bawk a ni.

MJA ten ramri-a duty an tlawh
Mamit District MJA te chuan nimin khan Mamit District leh Assam leh Tripura ramri hrul a awm khaw hrang hrang Suarhliap, Saikhawthlir, Chuhvel, Zawlnuam, Bungthuam, Luimawi, Thing-hlun leh Kanhmun-a Village Level Task Force te tlawhin an hmalakna leh duty dan bakah harsatna an tawh mekte an enpui a, henglai ramri-ah hian 4th IR Sipai te pawh tlemte an duty mekin ramri-a duty te hian Protective Gear, Hand Sanitizer, Glove leh Mask te an indaihlo hle tih an sawi a, heng duty te hi bawnghnute leh thingpui hmeh tur Chhang te an sem nghal bawk.

Bialtu MLA chungah lawm
Hrangturzo East leh West Block MNF te chuan thuchhuah intawm siamin an bialtu MLA leh Home Minister, Lalchamliana chuan a bial mipui te chhawmdawlna tur Rs. 3,85,000/- lai a pe tawh tih sawiin, heng tanpuina sum te hi a bial chhung khaw 17-a Village Level Task Force te kutah hlan vek a ni tih an tarlang a. Nimin khan a bial chhung mi rethei harsa zualte tan Rs. 1,40,000/- chu a mimal sum a rawn pe leh tih pawh tarlangin, “Kan bial mipuite tana a thil tih kan hmuh hian Hrangturzo MNF East leh West Block-te chu kan thlá a muangin kan lawm em em,” an ti bawk.

COVID-19 vei hmuh belh
Mumbai Mizoram House-a Cancer vei enkawl mi pakhat chu COVID-19 a kai tih hmuhchhuah niin Vawiin hian sawrkar chuan hemi chungchang leh hma an lakzui dan a puangzar dawn nia thudawn a ni.

Comments

Chhiar Hlawhte