MGNREGS hnuaia hnathawh theih dan tur ruahman

Sawrkar chuan rampum-a Lockdown kalpui mek a nih laia MGNREGS hnuaia mipuite inhlawh theih dan tur ruahmanna a siam.

Tunlai hripui COVID-19 leng avanga Lockdown thawh hnihna May 3, 2020 thlenga neih tur chungchanga inkaihhruaina Union Home Secretary & Chairperson, National Executive Committee under Disaster Management Act, 2005 in a tihchhuah hnuah Union RD Secretary chuan hemi hun chhunga MGNREGS kalpui dan tur thuchhuah a siam zui nghal bawk a. Tun dinhmunah COVID-19 positive case hi Mizoram-ah pakhat chauh hmuh la niin Mizoram dinhmun en chung leh sawrkarin inkaihhruaina a tihchhuah zulzui hian Lockdown thawhhnihna hun chhunga Mizoram chhunga Mahatma Gandhi National Rural Employment Guarantee Scheme kalpui dan tur inkaihhruaina (Advisory) chu Rural Development Department chuan a siam a ni.

Mizoram sawrkar-a Rural Developmwent Department in ruahmanna siam dan chuan Lockdown kalpui chhung hian Ministry of Home Affairs thuchuah Para 10 angin MGNREGS hnate hi thawh phal a ni a. Chutih rualin Job Card Holder te leh Official-te him nan uluk leh fimkhur thei ang berin Social Distancing (Feet 6 kar dana awm) ruahman tur a ni a, hei bakah hian hnathawk te chuan hmai an tuam (Face Mask/Protective Face Cover) chu an zawm ngei ngei tur a ni a. MGNREGS hnuaia hna thawh turah hian Tuikawng siam leh Tui humhalhna hna (Irrigation & Water Conservation Works) te chu uar bik (Priority) tur a ni ang.

Sawrkar laipui in a ruahman angin Central leh State hnuaia Scheme dang hrang hranga Irrigation leh Water Conservation hna te chu thawh chhunzawm phal a ni a. Heng hna te hi a theih chin chinah MGNREGS nena Convergence hmanga thawh tur niin District, Block leh Field level-a thawktute zawng zawng ten Social Distancing an kenkawh bakah hmai tuamna hman ngei ngei tur niin a zing thei ang bera tui leh sahbawn (soap) hmanga kut silfai te hi an hrechiangin, MGNREGS hnuaia hnathawktute zawng zawngin an zawm ngei ngei tur a ni a. Hemi chungchang hi uar thei ang berin Job Card Holder-te hnenah hnathawh tan hmain zirtir thin tur a ni.

Job Card Holder leh MGNREGS viltu Official ten hmai tuamna (Face Mask/Protective Face Cover) an mamawh a nih chuan MzSRLM hnuaia Self Help Group te nen tangho-in a siam dan ngaihtuah tur a ni a, Office kalpui dan tur chungchangah MHA instruction/Guideline para 19 angin RD Department hnuaia Head of Offices tin ten hma an la tur a ni a. Para 2 in a sawi angin Hotspot/Containment Zone-ah te erawh chuan eng hna (activities) mah thawh phal a ni rihlo thung.