COVID-19 darh tur venna atana Sawrkar in Lockdown a pawhsei ZPM in an thlawp

Zoram People’s Movement (ZPM) President, Lalliansawta chuan COVID-19 darh tur venna atana sawrkar in Lockdown a pawhsei chu an thlawp thu a sawi.
Mizoram mipuite hnena nimin a thuchah a tihchhuah ah ZPM President, Lalliansawta chuan COVID-19 laka invenna atan ni 25 lai kan inkharkhip hnuah Mizoram sawrkar chuan Kohhran te, NGO-te leh party hrang hrang hruaitute ngaihdan lakhawmin, April ni 30, 2020 thleng inkharchhip chhunzawm nise tia an rel thu sawiin, nitin eichawp dap, fairelbel ruak chhungkua kan tam tawh dan ngaihtuah chuan inkharkhip chhunzawm hi kan tlin tawh lo tih a sawi a. “Amaherawh chu hripui kan do mek hian India ram a fanchhuah mek dan te, min hual veltu ram zawng zawngah a tai darh mek dante ngaihtuah chuan, in venhimna atana tangkai bera ngaih, inkharkhip chhunzawm hi tihmakmawh ah ZPM chuan a ngai a, sawrkarin lockdown a pawhsei hi a thlawp a ni,” a ti.
Tunah hian COVID-19 hi Mizoram chhungah chuan a la tai darh lova ngaih a ni tih sawiin ZPM President chuan, “Uluk taka ramri ven hi Mizoram himna atana pawimawh tih hria a, ramri hnaia mi tlawmngaite mahni insengsova ramri veng tura an thawkchhuak hi a chhuanawmin a thlamuanthlak tak zet a, hmun tam takah ramri vengin Police-te tirhchhuah an ni ta bawk a, Police-te leh tlawmngai pawlte hi phawkhai rual taka kan thawh chuan hripui lakah kan ram hi a him theih a beiseiawm hle a ni,” a ti a. He hripui do hna hi ni tam thawh a ngai tawh lo tura rin a nih thu sawiin, mahse a hunlai-a do hnehloh erawh chuan chhiatna rapthlak tak thlen thei a ni tih a sawi a. “Inven dan tangkai bera ngaih chu inkharkhip a nih avangin, harsatna tawh belh tur a awm a nih pawhin chhel tak leh huai taka hmachhawn turin mipuite kan ngen a, mi inphalte an lo pen chhuak zel ang a, riltam mualpho kan awm hauh lo ang tih kan beisei,” a ti a. Kan hun tawn mek chu khirh hle mah se zam lovin, rilru fim tak pu-a hmachhawn a tul thu sawiin, “Mipuiten fing takin thu kan awih leh anga, he indona-ah hian Pathian hi kan lamah a tang duh ang tih ringin, tih takzet leh thahnemngai takin kan au zel dawn nia,” a ti bawk.

Comments

Chhiar Hlawhte