Home Minister in ramri hrul-a duty-na a tlawh

Home Minister, Lalchamliana chuan nimin khan Mamit District chhunga Bairabi leh Kanhmun-a COVID-19 hri lak a inven nana ramri a Police leh Screening point a duty bakah VLTF Duty te a tlawh a, ramri hrul-a khua awmte inpekna leh thawhrimnaah lawmthu a sawi bawk.
Home Minister, Lalchamliana hian Bairabi Screening Point tlawh hmasa berin COVID-19 hri vanga Mizoram mipuiin harsatna lian zawk kan tawh loh nachhan chu State dang atanga lo lut tur vengin ramri ah Task Force te leh Police leh Medical Team ten theihtawp an chhuah vang a ni, a ti a, ramri hrul-a khua awm te inpekna leh thawhrimna ah lawmthu sawiin, he hri dona kawng ah hian rampum-a kan thawhho a tul thu leh ramri hrul-a duty te mamawh zualpui ruahman dan tur te pawh Sawrkarin a ngaihtuah pui zel tur thu a sawi a. Duty te hman tur Hand Sanitizer, PPE, Mask, Glove leh duty te mamawh lamna tur pawisa a hlan nghal bawk.
Bairabi khawtlang hruaitute chuan Home Minister hi Bairabi North YMA Library-ah kawmin Bairabi-a COVID-19 laka invenna kalpui dan hrang hrangte tarlan a ni a. Bairabi khawchhung-a lut tur bungrua te chu darkar 72 khawih che lova khung hran a nih thin thu te, Bairabi khawchhung lut tam lova lirthei kal dan siam a nih thu leh Village Level Task Force ten ramri inkalpawh theihna hmun 20 chuangah duty-na hmun an siam tawh thu an sawi a. Ruihhlo zawnga ramri hrul-a veivak awm thin te khunghran an tul thu te, ramri a Police duty-na hmun tih changtlun a pawimawh thu te, ramri thlithlaina turin duty te thuamthat a ngaih thu te Home Minister hnenah hian Bairabi Village Level Task Force te chuan an lo thlen a ni.
Home Minister hian Kanhmun khua a Mizoram leh Assam inrina leh Mizoram leh Tripura inrina a Border Out-Post leh Task Force duty-na hmun te tlawh lehin an mamawh tur ang eitur leh invenna hmanrua te a hlan a. Kanhmun Village Level Task Force te nen inkawmna hun neiin State dang nen a inkalpawhna kawng khar rih a nih avang a nitin mamawh bungrua leh eirawngbawlna Gas-ah te harsatna an hmachhawm mai theih thu te leh hmun dang atanga bungrua lut te tih thianghlim dan tur te sawiho niin heng harsatna te sutkian a nih theih nan ruahmanna siam a ni bawk. Home Minister chuan State dang atang a lo haw te chu uluk tak a ni 14 chhung Quarantine thin turin Kanhmun VLTF te chu a chah a, Kanhmun VLTF hian ramri hrul-ah Duty Post 14 siamin mi 140 vel an duty thin a ni.
Home Minister hian Zawlnuam Village Level Task Force Duty te bakah Borai, Bungthuam, Colalian, Saikhawthlir, Thinghlun, Zamuang, Zawlpui leh New Eden-a Border Outpost a duty te eitur leh mamawh leina tur sum a hlan nghal bawk a ni.

Comments

Chhiar Hlawhte