Lockdown kalpui dan tura ruahman sa angin Serchhip District-ah Lockdown kalpui zel a ni dawn

Serchhip District Task Force Committee on COVID-19 chu nimin khan Serchhip-ah thukhawmin Lockdown kalpui tawh china hmalak dan leh hmachhawp te an thlirho a. Sawrkar thuneitu sang zawk atanga thuthar a awm hma chuan April 14, 2020-a sawrkar thupek chhuah angin Serchhip District chhungah Lockdown kalpui zui zel nise an ti.

Serchhip DC Meeting Hall-a Serchhip District Task Force Committee on COVID-19 thutkhawm hi an Chairman leh Serchhip District Bawrhsap, Dr. Lalzirmawia Chhangte chuan kaihruaiin Serchhip-a District Officers zawng zawng te chu engtiklai pawha an Station a awm reng turin a chah a, loh theihloh thil-a an chhuak dawn a nih pawhin phalna la ngei turin a hrilh a. Hun dang angin aan hna te an thawk tluang tawklo a nih pawhin a tul huna tangkai thei tura mahni hmuna lo awm chu sawrkar hnathawk hna pakhat a nih thu a sawi bawk. District Bawrhsap chuan Mizoram Chief Secretary leh State Executive Committee on DM Act, 2005-a Chairman ni bawkin April 14, 2020-ah Lockdown chu May ni 3, 2020 thlenga pawhsei a nih thu Order a tihchhuah angin lockdown hi tha taka chhunzawm tur a nih thu leh thuneitu sang zawk atanga thuthar dang a awm loh chuan engkim a ngai anga la kalpui zel rih tur a nih thu a tarlang.

Hei bakah hian District Bawrhsap chuan mipuite chu boruak pangngai laia kan nunphung anga nun tum tlat thei kan la ni rih lo tih hrereng tura ngenin, ei leh in thu-ah te, kan nitin khawsak phung-ah te pawh nidang kan lo phak lo a nih pawhin phun mai lova, ramin hun harsa a tawh lai a ni tih hria a, sawrkar thu tha taka zawm tum theuh turin a ngen a ni.

He thutkhawm ah hian Serchhip District Task Force Committee on COVID-19 hnuaia Medical Team hmalakna bakah, Security lama hmalakna te, Supply Chain Management Committee hmalakna te, DCSO atanga hmalakna te, Excise & Narcotic hmalakna te, District Jail chungchang leh Joint VC atang leh YMA lam atanga report te ngaihthlak a ni a. Thil duhawm lo engmah a la awm hrih lova hriat a ni.

Tun dinhmunah ei leh bar chungchang ah Serchhip District dinhmun a zia rih hle ah ngaih niin eil eh bar chhekkhawl dinhmun pawh nitin a thara lak reng niin Wholesaler te pawh tha taka bungrua la zel tura chah an ni a, an bungraw phurhluhna tur Inter-State paltlang phalna erawh Home Department lama dil ngai a nih avangin DC Office atangin Home Department-ah hian dilna lut apiang rang taka thawn thlak nghal zel a ni a, niminpiah khan Home Department hian Serchhip District atanga dilna lut atangin Truck 14 te tlan phalna a pe a ni.

Hetihlai hian Serchhip-a sumdawng ten Silchar leh a chhehvela an zuk dawr thin sumdawng ten thil man an lo tihsan hlawm avangin Serchhip-ah pawh thil man hi a sang chho deuh tih he hunah hian tarlan a ni a, hemi chungchang ah hian Supply Chain Management Committee leh Legal Metrology ten a theih ang angin mipuiten an tawrh nasat zel loh nan hma an la reng bawk a. Dan phal loh-a mipui nitin mamawh bungrua lo chhekkhawl a awmlohna turin hmalak zel niin sumdawngte chu a man to a hralh tura a ruka an bungrua te lo chhekkhawl lo tura ngen an ni bawk.

Hei bakah hian Tuialhthei dinhmun pawh a tha thawkhat a, eirawngbawlna Gas pawh tluang takin a rawn thleng zel a, heng Gas phur Truck leh Gas bur te hi PHE Department lamin an pek Chlorine hmangin tih thianghlim hmasak a ni.