Mamit DC hovin ramri-a venhimna hna thawh chungchang sawihona neih a ni

Mamit District Bawrhsap leh District Level Task Force Chairman, Dr. Lalrozama IAS chuan nimin khan Mamit District ramri hrula Village Level Task Force hruaitute chu Zawlnuam College-ah a kawm.
Nimin-a ramri hril-a VLTF hruaitute a kawmna hunah hian Mamit DC chuan khawvel puma hripui leng mek laka Mamit District mipuite himna tura rim leh hah taka duty, Village Level Task Force hrang hrangte hmalakna chu thlamuanthlak a tih thu sawiin, kan thenawm State-ah hri kai hmuh an nih tak avangin ramri hrula awm, Langkaih Group leh Taitesena Group YMA huamchhung khaw hrang hranga kalkhan awm thei zawng zawngah ngawrh taka duty kalpui chhoh mek zel a nih thu a sawi a. Hripui laka ramri veng tura thawkchhuakte chu raldo tur an nih loh avangin silai nena duty lo turin a ngen bawk.
He hunah hian khaw hrang hranga VLTF hruaitute hian anmahni huamchhung theuha ramri venhim hna an thawh dan leh duty post an siam dan report pe-in, harsatna an tawh hrang hrangte sawiho zui a ni a. Langkaih Group YMA President hnen atangin eirawngbawlna gas-ah Tripura lama lakluh thin tihtawp a nih tak avanga harsatna an neih thu report ngaihthlak a nih bakah Taitesena Group YMA President pawh-in an huamchhungah duty post 30 siam niin, heng ah te hian tlawmngai-a duty mi 150 lai an awm thu a sawi bawk a. Ei leh bar, nitin mamawh hrang hrangah harsatna awm theite thlirho zui niin Sawrkar atanga Ration Card neilo leh Sipai duty-te tan Ration chungchangah harsatna an tawh thu ngaihthlak niin, hnathawhna avang leh Ration card neihloh vanga buhfaia harsatna neite tan hian felfai taka ziakin DC Office-ah thehlut tura tih an ni bawk.
Hei bakah hian ramri ven hna ngawrh leh uluk taka kalpui mek zel a nih laia thenawm State atanga ruihlo lakluh tum an la awm thin chungchanga hmalak dan tur pawh sawiho a ni a. Heng khaw hrang hranga VLTF te nen hian ruahmanna siam niin, mahni Veng/Khua theuha hetiang tih ching awmte chu dahhran/khunghran mai ni se tih a ni a. Hemi kawngah hian a huamchhung VLTF te theuh hmala tura tih an ni a. Langkaih Group leh Taitesena Group YMA ramri hrul venhim hna thawk tura Mizoram Sawrkar-in Police duty tur mi 70 a pek belhte chu khaw dinhmun a zira an duty-na tur siam rem a nih thu Kawrthah SDPO chuan a sawi bawk.
Nimin a he sawihona hunah hian Mamit SP leh Zawlnuam BDO te bakah Mamit-a CMO, DCSO, SDPO, SDPO Kawrthah, Central YMA aiawh leh Mamit District Village Council Association bakah Group leh Sub-Hqrs. YMA aiawh bakah khaw hrang hrang 15 atanga VLTF aiawh mi 29 te an tel a ni.

Comments

Chhiar Hlawhte