I&PR Minister in Mizoram aia hma la tha an awm a hrelo

Information & Public Relations Minister, Lalruatkima chuan Mizoram anga COVID-19 laka invennaa hma la tha an awm a hriat loh thu a sawi.
Mizoram mipuite hnenah thuchah a tihchhuah ah I&PR Minister, Lalruatkima chuan he thu hi sawiin, hei hi Kohhran, NGO leh Sawrkar nen thawhhona tha tak kan neih avang a nih thu leh Kohhran, Khawtlang, Village/Local Task Force te thahnem ngaihna ah mipuite an thlamuang a ni, a ti bawk. I&PR Minister chuan COVID-19 avanga khawvel sawrkar lian leh chakte an buai mup mup karah, he natna laka kan him theihna tura inven hna thawktu Health Department, dan leh thupek kengkawhtu, Tui, electric leh NGO hrang hrangte inpekna chu hnamdangten an lo hriat ve thu leh ropui an tih thu National newspaper thlengin hmuh tur a awm chu lawmawm a tih thu a sawi a. Social Media hrang hrangah mipui ten thuthar kan hriat zung zung theihna turin sawrkar chuan theihtawp a chhuah zela, sawrkar thuchhuak lo chu ring mai lo tur leh mipuite chi ai mai lo tura ngenin, ei leh barah mipui te thlaphang lo turin a chah a, Lockdown chhung hi ni 14 lai a la awm dawn avang erawh chuan mipuite chu ei leh bar, Electric, Tui leh thildang inremchem ngai apiangah inrenchem turin a chah bawk.
I&PR Minister, Lalruatkima chuan Vawiin, April 1, 2020 chu ‘April Fool's Day’ a nih avangin mipui tichiai zawng leh thudik lo te Social Media-a vawrhdarh lo turin mipuite chu a chah a, hetiang hi ti an awm a nih chuan an chungah Dan anga action lak a nih tur thu a sawi a. Vawiin thlenga harsatna leh buaina lutuk kan tawh loh chhan chu mipuiin sawrkar thu an ngaihchan thiam vang a nih thu pawh sawiin, thu awih taka sawrkar thu zawm chhunzawm zel turin a ngen bawk.

Comments

Chhiar Hlawhte