COVID-19 laka himna tura Personal Protective Equipments (PPE) hman dan tur sawifiahna nei

COVID-19 Medical Operational Team te chuan nimin khan Aizawl-ah thuthar thehdarhtute kawmin tunlai hri leng mek chungchangah Personal Protective Equipments (PPE) tangkai zawka hman dan tur hrang hrang an sawi.
Aizawl Hospital-a thuthar thehdarhtute an kawmna hunah hian COVID-19 Medical Operational Team Leader, Dr. Z.R Thiamsanga chuan India ramah PPE supply a tam tawk loh avanga mipuiten PPE hmandan tur dik leh a hmanna chiang zawka an hriat theihnan leh COVID-19 chungchanga hriattur pawimawh an hriat theih nan he hun hi buatsaih a nih thu sawiin, kan hmalam hun a hriatloh avangin PPE hi thiamtak leh tangkai taka hman a ngai tih a sawi a, District zawng zawngah leh Primary Healthcare Center-ah PPE sem vek turin sawrkar chuan ruahmanna a siam thu sawiin, hriatchianloh leh hlauhthawnna avanga Personal Protective Equipments (PPE) mahni a lo leikawl leh chheprel chu ti lo hram tur leh leikawl tam tak te pawhin Medical Personnel ho hman atan pe (donate) hial se an duhthu a sawi bawk.
Tunhnaia mi tam takin an lei leh anmahni thu-a an lo ei lawk, Hydroquinine leh Azythromycin eipawlh chuan lungphu a tih muan theih avangin, Doctor ten ECG test result an en hnu a eitur an tih chauh loh chuan mahni thu a eilo turin mipuite an ngen nawn leh tih COVID-19 Medical Operational Team chuan an sawi a, COVID-19 laka invenna atan Gloves hman aiin, sahbawn a kut silfai ngun a pawimawh zawk tih mipuiten hre nawn leh se an duh thu sawiin, Gloves hman tam chuan Environmental pollution a siam thu leh thawi thei mai a nih loh avangin Environment tichhe tu pakhat a ni thei tih an sawi bawk.
Personal Protective Equipments (PPE) tih hian Gloves leh Medical Masks (Triple Layer Mask) leh N95 Masks, Googles emaw face shield (hmai khuhna), Gowns, Respirators, Aprons leh Shoe covers te a huam thu pawh sawiin, COVID-19 vanga rinhlelh damlo lak hran (isolate) ngai ah te, ICU a COVID-19 damlo dah nan ten, Damlo thawhhah, COVID-19 kai rinhlelh an awma Ambulance-a buaipuitu tan te, Hrawk atanga Sample swab latu tan te, COVID-19 avanga mitthi ruang sawngbawltu leh tifaitu Medical Team te leh Postmortem ngai Posmortem tu tan te hman tur a nih thu an sawi a. N95 Mask chu COVID-19 Symptoms nei- Kuh, Thawhhah leh COVID-19 damlo leh enkawltute bakah Health Care pe tu-Doctor, Nurse leh Sanitation lam incharge te hman tur a nih thu an sawi a. COVID-19 a darh loh nan Alcohol atanga siam kut silfaina (hand sanitizer) emaw, Sahbawn emaw hmanga Kut tih thianghlim te, Mit, Hnar leh Ka khawih loh te, Respiratory Hygiene vawnthata Kuh emaw, hahchhiau emaw in kiu tih tawma khuh tur a nih thu leh midang nen meter 1 (khat) tala inhlata awm a pawimawh thu bakah Chil chhak chu hri inkaidarhna awlsam tak a nih theih thu te pawh an sawi bawk.

Comments

Chhiar Hlawhte