AMC in Duty-na a hman tur Solar Home Light an hlan

Aizawl Municipal Corporation (AMC) chuan Mizoram Police ramri a duty te hman turin nimin khan Solar Home Light 90 a hlan.

Heng Solar Home Light te hi AMC aiawhin Mayor, PC. Lalhmingthanga chuan Mizoram Police aiawh, John Neihlaia, IGP hnenah a hlan a, heng Solar Home Light hlanna hunah hian AMC Mayor chuan an thil hlan chu thil hlu ber leh tha ber ni lo mah se ngun taka AMC in an ngaihtuah hnuah tangkai taka an hman tur a nih beiseiin an hlan tih a sawi a ni.

He hunah hian John Neihlaia IGP chuan an mamawh em em AMC atanga an dawng chu lawmawm a tih thu sawiin, tangkai taka an hman ngei a beisei thu a sawi a. Mizoram Police te ramri hmun hrang hrang 135-ah an duty mek thu leh COVID-19 kaihhnawiha Social Media lama thu dik tawklo leh dan phalloh thehdarh a ni thin chu pawi a tih thu sawiin, hetiang vang hian case engemaw zat an siam tawh thu leh mihring 25 an man tawh thu a sawi a. Social Media hmandik leh hman tangkai chungchangah mipuite thahnem ngai taka lo zirtir turin Councillor te chu a sawm nghal bawk.

He hunah hian AMC Mayor chuan Councillor ten an Ward-a Local Level Task Force tina sem tur Rs. 10,000/- chu a hlan nghal bawk.