Chanchin thar thenkhat :

Online-a Class neih dan tur rel

Health & Family Welfare Secretary, H. Lal-engmawia hovin nimin khan a Office-ah Health Department hotute leh Zoram Medical College (ZMC) hotute bakah ICT Department leh BSNL hotute chuan COVID-19 hri leng avanga ZMC a Class chhunzawm theih loh (suspend) avanga online-a class lak dan tur an sawiho a. ZMC-ah hian 1st year leh 2nd year zirlai te awmin, an vaiin zirlai 198 an awm mek a, Subject hrang hrang Anatomy, Physiology, Biochemistry, Pathology, Microbiology, General Surgery, General Medicine, Community Medicine, Obstetrics & Gynae-cology, Pharmacology leh Forensic Medicine te neiin Department thenkhat ah chuan Online in Class kalpui a ni tawh a, April ni 20, 2020 atang hian ICT Department nena tangkawpin ni khatah Subject hrang hrang class tam lehzual leh chang-tlung zawka neih tura ruahman a ni.

MAP Duty-na ah boral
COVID-19 laka Mizoram alo him theihna tura Lawngtlai District chhunga Mizoram leh Myanmar inrina hmun Archhuang kai-a duty MAP, Hav. F. Lalthansanga (52), Lunglei Lung-lawn chu nimin zing dar 8:00 vel khan South Lungpher PHC-ah a boral. Thudawn danin Hav. F. Lalthansanga hi nimin zing khawvar hma khan a pum te na in a luak a, a thawhpui ten damdawi In hnai ber, South Lungpher PHC chu panpuiin chhan hman a ni ta lo a ni. Hav. F. Lalthansanga hian nat lawkna engmah a neih hriat a ni lo a, tunlaia natna leng mek, COVID-19 natna lanchhuah dan pawh a mah-ah hian hmuh tur a awmlo a, a ruang hi an chenna, Lunglei panpui nghal niin nimin vek khan vuiliam nghal a ni.

Aizawl-ah thlai lut tam
Thla kalta March 28 atanga April 16 thleng khan Vegetable Supply Chain Committee hma-lakna in Mizoram hmun hrang hrang atangin Ai-zawl-ah thlai thar Truck Trip 133 phurhluh a ni tawh a, kuthnathawktute hnenah Rs. 87,78,000 zet a lut tawh a ni.

Essential Commodities sawiho
COVID-19 Task Group on Commodities chu nimin khan FCS&CA Commissioner, HL. Ro-chungnunga hova thukhawmin Hri hlauhawm a len leh inkharkhip kalpui chhunga Zoram mipuite ei leh bar, buhfai leh thil dang te, nitin mamawh Gas leh Motor Oil te an neih zel theihna tura hmalak dan te an thlirho a, mipui mamawh Oil leh thildang ram pawn atanga Vairengte thlenga phurhluh dan tur leh load dang la leh tura motor leh driver te in banlet dan tur an duangfel a. Hei bakah hian Essential Commodities driver te tana COVID-19 avanga damlohna leh chhiatna tawk palh thei te tana insurance awm thei te an sawiho nghal bawk.

Mi 66,905 enfiah tawh
Nimin thleng khan Mizoram-ah COVID-19 Screening neih chhunzawm zel niin mi 66,905 zet enfiah an ni tawh a, heng atang hian mi 2449 te chu mahni In lama inkhunghrang tura tih niin mi 253 te chu hmun ruat bik-a inkhung-hrang (Facility Quarantine) tura tih an ni a, mi 94 te chu enfiah tura an Sample lak ni tawhin heng atang hian COVID-19 vei hmuhchhuah mi 1 a awm tawh bawk a, damdawi In ah enkawl mek ala ni. Heng bakah hian COVID-19 vei nia rinhlelh mi 25 te chu damdawi In-ah dah ni tawhin an zinga mi 23 te chu chhuah tir an ni tawh bawk.

Oil Palm hralh theih dawn
Mizoram-a Oil Palm chingtu ten Lockdown avanga an thlai tharchhuah kawnga harsatna an tawhlohna atan karleh Thawhtanni, April 20, 2020 atang khian Godrej Company chuan Buk-vannei-a Oil Palm Mill-ah Oil Palm rah an lei tan dawn a. Oil Palm hi Mizoram atang chuan Mamit leh Kolasib District in tharchhuak tamin kum khat-ah cheng nuai 250 man vel an hralh thei a, a vaiin cheng vbc. 14 vel zet Oil Palm chingtute hian an leichhuak tawh bawk a ni.

Power Shutdown thulh
Power & Electricity Department in Vawiin a Aizawl leh Lunglei inkar 132kV Line  Pre-Monsoon Checking & Repair neih an tum chu khua in a bumro thei dawn nia a lan avangin thulh a ni a, hei vang hian Power Supply pawh dan pang-ngaia pek theih beisei niin hun remchang hmasa berah he hna hi thawh leh tum a ni ang.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn