Chanchin thar thenkhat :

Chinghnia in Sial vulhte bei

Serchhip District chhung Sailulak khuaa Sial vulh zinga 10 chuang chu tunhnai khan Chinghne rualin an khawih sak a, Sial vulhtute an mangang hle nia thudawn a ni. Serchhip District chhungah hian Leng khua leh Sailulak khua ah te Sial hi chhungkaw engemaw zat in an vulh a, thenkhat chuan Bank loan te lain Sial hi an vulh a, amaherawh chu kar kalta vel atang khan Chinghnia te hian an Sial hi an khawih sak a, Sial 10 vel zet bei tawhin Sial vulhtute hian Sial tlatna hmunah an invenchhawk mek tih an sawi bawk. Heng an Sial beitu Chinghnia hi a tak la hmu chiahlo mah se a hniak erawh an hmu tih Sailulak khua te chuan an sawi a, hemi chungchang hi Forest Department-ah pawh an thlen tawh thu leh eng tianga hnawhbo tur nge an la hriatloh thu an sawi bawk. Sailulak khua ah hian chhungkaw hrang hrang ten Sial 260 chuang an vulh mek a ni.

Mi 2 thubuai siam sak tawh

India ram puma inkharkhipna (Lockdown) dan kalpui mek Khawzawl District-ah pawh khauh taka kalpui mek zel a ni a. He inkharkhipna (Lock-down) dan zawm tha duhlo mi 2 (pahnih) te chu thubuai siam sak ni tawhin, midang 16 te chu PR bond sign tir an nih hnuah chhuah tir leh an ni tawh bawk. He inkharkhipna Dan bawhchhia te hi Disaster Management Act, 2005 (Section 51-60) hmanga kum hnih (2) chhung lung In tan leh pawisa chawi tira hrem theih niin, Indian Penal Code Section 188 hnuaiah thla khat (1) chhung Lung In tan leh pawisa chawitira hrem theih a ni bawk. Khawzawl District-ah hian in-kharkhipna tha taka zawm a nih theih nan Drone hmanga Patrolling neih tawh tum a ni bawk.

Mizoram dinhmun thar ber

Nimin tlai dar 3:00 thleng khan Mizoram-ah mi 63248 te COVID-19 Screening neih ni tawhin In lamah khunghran 2449 leh sawrkar hmun siam-a khung hran 207 an awm tawh a, mi 58 te sample lak tawh ah mi 56 te result hre tawhin COVID-19 vei 1 a awm tawh a ni.

Mamit-ah mi 48 khung tawh

Novel Coronavirus (COVID -19) hrileng mek avanga Mamit District chhunga Sawrkarin a siam, Quarantine Centre hrang hrang leh mahni In a khunghran (Home Quarantine)-ah nimin thleng khan mi 48 awm tawhin an zinga mi 4 te chu rinhlelhna tur an awmloh avangin chhuah tir an ni tawh bawk.

HISSLAM in lawmthu sawi

Higher Secondary School Lecturers' Association of Mizoram (HISSLAM) chuan Director of School Education-in COVID-19 dona atana CM Relief Fund atan an theih ang thawh tura a ngen angin Rs. 10,97,509/- an thawh tih sawiin, an Member te chungah lawmthu an sawi.