Doctor te rawn theiha awm reng turin hriattir an ni

Mizoram sawrkar-a Health & Family Welfare Secretary chuan sawrkar hnuaia Doctor thawk zawng zawngte chu anmahni thawhna hmun theuha ah mipuite tan rawn theiha awm reng turin a ti.

Hemi chungchanga nimin a thuchhuah a siamah Health & Family Welfare Secretary chuan COVID-19 hrileng laka Mizoram mipuite kan him zawkna turin Mizoram sawrkar chuan Lockdown leh Social Distancing a puan/hman chhung hian Mizoram Sawrkar hnuaia Doctor thawk zawng zawngte chu anmahni thawhna hmun theuha an Office Phone No. leh an Private Phone No. ah mipuite tan rawn theiha awm reng turin a ti a. He hrileng a kian hma hi chuan Doctor zawng zawngte chu, damlohna leh harsatna bik an nei anih loh chuan anmahni post-ah theuh mipuite tan rawn theiha awm reng tur leh mipui zawhna te hawihhawm taka lo dawngsawng tura ngen leh hriattir an ni tih a tarlang a ni.

Hei bakah hian Health Secretary chuan sawrkar Damdawi In leh Private Hospital thenkhat, damlo admit tur chungchangah thawk lam buaina emaw, harsatna (Respiratory problem/disease) nei ten harsatna an tawk ni awma hriat a ni tih tarlangin, ‘Mi tupawh damlo harsatna, a bikin thawk lam harsatna/buaina (Respiratory problem/disease) neite chu Sawrkar Hospital leh Private Hospital ten a tul ang zelin tha takin an lo enkawl theuh tur a ni,’ tiin nimin khan thuchhuah a siam bawk.