COVID-19 leng mek chungchanga Media te hmalakna ah Health Minister in lawmthu a sawi

Health Minister, Dr. R. Lalthangliana chuan COVID-19 hri leng chungchangah Zoram hmun hrang hranga Media - Print leh Visual ten sawrkar hmalakna leh ruahmanna te tha taka zawmin mipui-ah inzirtirna tha an thehdarh nasat avangin khawvel hmun dangte angin harsatna lian lutuk kan tawk lo nia sawiin, Media te chungah lawmthu a sawi.

Health Minister, Dr. R. Lalthangliana hian Zoram Media te hnena lawmthu sawina leh thuchah nimin-a a tihchhuah ah he thu hi tarlangin, mipui ten thudik leh rintlak an hriat theih nana nasa taka hma la thintu I&PR Department-a thawktu ten hahchawlh pawh nei hman mang lova theihtawp chhuaha chak taka thu thar ber ber an tarlang nghal zel chu fakawm a tih thu leh lawmawm a tih thu tarlangin, chutih rualin COVID-19 avang hian inventhawn thilah Print Media pawh chawlh hial ngai mahse Media-te chu kan ram leh hnam kalsiamtu pawimawh tak an nihna hre renga an mawhphurhna hlenchhuah ngei tuma hlawkna engmah beisei miah lova hun leh tha bakah an thiamna nasa tak senga PDF hmanga Chanchinbu an tichhuak leh Electronic Media ten theihtawp chhuaha mipuite hnena thu dik leh hriattur pawimawh tak tak, zirtirna tha an puangchhuak zel chu chhuanawm a tih thu leh ropui a tih thu a tarlang a. “Kohhran leh YMA Chanchinbu te pawhin COVID-19 dona kawnga sawrkar hmalakna leh ruahmanna te tha taka min puanzar sakin mipuite thinlungah thu tha leh pawimawh tak tak min tuh sak avangin lawmawm ka ti tak meuh a ni,” a ti bawk.
Mipuite rilru sukthlek kaihruaitu pawimawh tak Media ten sawrkar hmalakna an thlawp that avang hian mipui ten thu an awihin invenhimna an ngaipawimawh hle tih Health Minister chuan sawi bawkin, chumi avang chuan he natna darh chak tak, COVID-19 pawh hian min luhchilh thuk thei lo nia a hriat thu a tarlang a. “Hetianga Media-te hmalakna tha tak avang hian India ram pumpui ah kan state (Mizoram) chu thangmawiin 'hma la tha ber' tih hiala sawi kan ni chho mek hi a lawm-awm takzet a, Zoram Media-te chungah lawmthu ka sawi tak meuh meuh a ni,” a ti bawk.
Health Minister chuan COVID-19 do beihpui hi engtin nge kalpui zel a nih dawn tih chu la sawi theih a nih loh thu pawh tarlangin, “Kan hmalam hun lokal zel turah tha thlah lovin inlung-rualna nen thawhhona tha kan neih zel ka beiseiin ka duh takzet a, ka sawm nghal bawk che u a ni,” tiin kan ram leh hnam damna tura Media te inpekna leh thawhrimna chuan rah tha chhuahin hriatreng a hlawh ngei ang tih a tarlang bawk.

Comments

Chhiar Hlawhte