COVID-19 vei te dinhmun Health Minister in sawi

Health Minister, Dr. R. Lalthangliana chuan tunhnaia Mumbai leh Shillong-a COVID-19 vei Mizo 2 awm thar chungchang nimin khan a chenna In ah a sawifiah.

Health Minister chuan Mumbai-a COVID-19 vei hmuhchhuah thar chu Hnute cancer, Mumbai-a engemawchen lo inenkawl tawh a ni tih sawiin, April 13, 2020 zing dar 6:00-ah positive a ni tih hriat a nih thu a sawi a, a tirah ICU-ah admit ni mah se ICU atang hian Private Ward-ah sawn chhuah tura ruahmanna siam leh a nih tawh thu leh a sample enfiah nawn lehin nizan lam khan result hriat theih a nih dawn thu a sawi a. Mumbai-a Mizoram House chu damdawi (disinfectant) hmanga kah thianghlim nghal a nih thu leh House-a damlo mi 16 leh anmahni enkawltu mi 32 te pawh an  dinhmun enfiah vek a nih dawn thu a sawi bawk.

Shillong-a COVID-19 natna kai thar Mizo pakhat chungchang pawh Health Minister hian ngaihvenin a thawhna Bethany Hospital leh NEIGHRIMS Hospital-a Doctor te a biak thu sawiin, damlo hi a dinhmun a that thu leh ICU-ah dah ngai lovin Bethany Hospital Private Ward-ah enkawl mek a nih thu a sawi bawk.