Chawm Kai Lei dawh mek :

Serchhip Mat Phai Chawm kai-a Lei (Bailey Bridge) dawh hna chu Garden Reach Company, Kokatta te chuan March 31 atang khan thawkin tun thla ni 15-ah khian zawh hman an beisei thu an sawi a. He Lei dawhna tur hian August 23, 2018 khan khatihlaia Chief Minister, Lal Thanhawla chuan lung-phum phumin thla 18 chhunga zawhfel tur a ni a, amaherawh chu Serchhip ram lama Lei innghahna tur siamna-ah harsatna a awm avangin duh angin hna hi thawh chak theih a ni ta lo a, amaherawh chu thla 20 hnu velah an zo thei dawn niin a lang a ni.

He Lei hi NEDP sum cheng nuai 571 senna tura ruahman niin feet 180 a thui, feet 9.10 a zau tur a ruahman a ni a. Ton 24 dawl zo tura ruahman niin a Lei chhuat (deck level) hi meter 381.467-a sang tur niin Fur tui chimsan lai ber aiin metre 2 a sang dawn a, Mizoram a Galvanized Bailey Bridge hmasa ber tur a ni.