Mizoram-a Inkharkhipna kalpui zel dan turah sawrkar in ruahmanna a siam fel ta

State Level Task Force on COVID-19 chu nimin khan an Chairman MizoramChief Secretary, Lalnunmawia Chuaungo hova thukhawmin Sawrkar Laipui-a Ministry of Home Affairs-in COVID-19 hripui darh zel tur venna atana hmalak dan tur thupek April ni 15, 2020 a tichhuah dungzuiin Mizoram Sawrkarin he inkharkhip thawhhnihna kalpui dan tur an duang.

Secretariat Conference Hall, Aizawl-a State Level Task Force on COVID-19 in Mizoram-a Lockdown thawh hnihna kalpui tur an duan zingah hian ramdang (Foreign Countries) leh State dang nen-a inrina (Inter-State boundary) te chu khar chhunzawm zel a ni ang a. Bairabi leh Vairengte-a kaltlang kawngpuite erawh chu phalna nei bungraw phur lirtheite tan hawn chhunzawm a ni anga. Mipui zin veivahna lirthei erawh chu khap tlat niin ramri (International leh Inter-State) ah khauh (strict) taka duty chhunzawm zel a ni ang.
State pawn atanga bungraw lakluh theih zingah nitin mamawh (essential commodities) te chu phalna hranpa lak ngai lovin lakluh theih a ni anga. Amaherawhchu SDO (C) Vairengte emaw SDC Bairabi hnenah declaration (prescribed form hmangin) an thehlut ngei ngei tur a ni. Nitin mamawh (essential commodities) ni lo, ei leh bar zawnna leh hmasawnna atana mamawh bungrua - Steel, Insakna bungrua ilo la lut tur te erawh chuan hemi atana dilna Form siam hmangin Home Department phalna lak hmasak tur a ni thung ang. Inter-State leh Inter-District ah mipui zin leh veivah khap tlat a ni a. Chhiat tawh thil ah thisen zawmpui chhungkaw hnai zual bik leh damlohna avanga loh theih loh thilah chuan an awmna District Deputy Commissioner hriattirin an awmna Local Task Force te phalna in State chhunga hmun dangah kal theih a ni ang.
Mizoram chhunga thilsiam, vulh leh tharchhuah te chu Mizoram chhunga hmun hrang hrangah bungraw chet tanna tur District-a Deputy Commissioner te phalna-in thawnchhuah theih a ni anga. Bungraw lakluh leh thiar chungchang atan hian Mobile application siam a ni dawn a, peihfel a nih veleh heng ruahmanna te hi a tul anga tih danglam a ni ang.
Sawrkar Pisa kai chungchang ah Health Services, Venhimna leh Dan leh thupek kenkawh hna thawktu hrang hrang, Disaster Management, Civil Aviation, Municipal Services, Forest Field Works, PHE, P&E te chu a pangngai (full strength) in an kal anga. Sawrkar Office dang– Secretariat, Directorate, District Administration leh Field Office dang te hawn an ni ang a. Group A leh B Officer te chu dan pangngaiin Office kal vek tur niin Group C leh D Staff erawh chu hmun thuma thena hmun khat zelin an in kalchhawk anga. Office chhungah phalna la hmasa lovin pawnlam mi kal phal ni lovin Phone in emaw an hmuh duh te phalna an la phawt tur a ni.
Lockdown chhung hian mi 5 (panga) aia tam punkhawm khap tlat niin tul bik thil - damdawi lei, buhfai/ration lak, chawhhmeh leh ei bar lei tura chhuah lawk tih loh ah chuan mahni In leh compound chhuahsan phal a ni lo a. Pawn chhuak tur leh damdawi In a kal tur reng reng chuan Face Mask leh hmanraw dang hmangin hmai an tuam ngei tur a ni.
Vantlang hmun leh dawr-a kalte chu metre khat (1) tala inhlata awm tur niin phalna neia dawr hawnte chu tlai dar 5:00-ah khar vek tur a ni a. Khawtlanga inkharkhipna kalpui chung-chang ah hian LLTF/VLTF te chu an bial chhung theuhah an hmalakna te chhunzawm tura beisei leh ngen an ni bawk.
Hmasawn nana hnathawh tul - Retaining Wall/Drain/Kawng siam, Building sak leh a dangte chu hna awmna District DC te remtihna la in thawh phal a ni a. Heng hnate hi ramchhung a awm sa labour te chauh ruai-a thawh tur niin Loneitu leh huan neitute, ran vulhtute, Sangha Dil neitu te leh a thawktute chu phalna hranpa lak ngai lovin an hna thawh phalsak an ni bawk.

Comments

Chhiar Hlawhte