Committee on Psychological and Social Guidance in Local/Village Task Force te thu awih turin an chah

COVID-19 Committee on Psychological and Social Guidance chuan Local/Village Task Force te thu awih tura mipuite chu chahin, Local/Village Task Force te pawhin mipuite leh sawrkar inkar-a ding an ni tih an in hriat a pawimawh thu an sawi.

COVID-19 Committee on Psychological and Social Guidance hian thuchhuah siamin COVID-19 hripui lengin khawvel pumah harsatna a thlen tak avangin Mizoram sawrkar chuan hri leng laka kan him theihna turin a hmalakte zingah State Level Task Force on Mitigation of Coronavirus (COVID-19) a din thu leh hei hian Local Council leh Village Council tinah Local Level Task Force (LLTF) leh Village Level Task Force (VLTF) a din nghal thu tarlangin, Hri leng mek laka mipuite kan himna tura Inchhungkhung (Total Lockdown) leh Curfew hial te puan a nih hnuah phei chuan anni hi sawrkar leh mipuite inkara kan aiawha engkim buaipuitu an ni ta bera a lan thu an tarlang a. Local/Village Task Force te chu khawtlang hruaitute leh Tlawmngai Pawl hrang hrang leh Kohhran hruaitu te atanga ruat an ni hlawm tih sawiin, “Mahni leh chhungkaw sahimna pawh ngaihtuah hlei thei lovin, mahni khua/veng theuhah sawrkar thuchhuah lo kenkawhpui leh mipuite harsatna lo sutkianpui chu an hna pui ber a ni ta a ni,” an ti a. He hrileng laka kan chhungkua, kan Veng/khua leh kan ram pumpui a him theih nan chhun leh zanah rim takin an thawk tih an sawi bawk.

Hei bakah hian kan nitin khawsakna a mamawh tak tak thil (essential commodities) chu sawrkar pawhin a ngaihtuah zel ang tih pawh tarlangin COVID-19 Committee on Psychological and Social Guidance chuan, mipuite pawhin kan mamawh kan tihtlem tial tial a ngai tih an tarlang a. “Tunah hian khawvel pumah thil siamchhuahna hmunpui (Industries leh Factories) an chawl thuap tawh a, a awmsa hian a daih rei dawn lo. Tuna a awmsa ei leh in thilte pawh hi chhiat hun (expiry) nei vek an ni a, awm reng mah se hmantlak loh hun an nei dawn. Kan khawsak dan phung pangngai renga khawsak reng kan tum chuan harsatna tak tak a lo thlen hunah kan buai ang. Chuvangin tun atang hian inrenchem, a samkhai thei ang bera khawsak leh mahni intodelh i zir tan ang u,” an ti bawk.