Chanchin thar thenkhat :

Vairengte-ah zirhona nei

S COVID-19 Medical Operation Team ten Mizoram-ah thlai leh thei te thianghlim tak leh mipui tana him tura lakluh a nih theihna tura rua-hmanna an lo siam tawh angin nimin khan SDO (C) Conference Hall, Vairengte-ah eitur him zawk a lakluh dan tur leh COVID-19 a Task Force duty te invenna kawng a hriattur pawimawh hrang hrang inhrilhhriatna hun neih a ni a, he hun hi bialtu MLA, Lalrinsanga Ralte chuan hman-puiin HD Lalrintluanga, Joint Director, Commerce & Industries Department leh Covid-19 Medical Operation Team atangin Dr. John Zo-hmingthanga, Deputy Medical Superintendent, Civil Hospital, Aizawl leh Dr. Joel L. Pautu, Health & Family Welfare Board Member ten mipuite zirtirna an pe a ni.

MLA ten thlai chi an sem
Tuirial bialtu MLA, Andrew H. Thangliana chuan Nilaini khan a bial chhung khaw hrang hranga Village Level Task Force (VLTF) te tlawh kualin thlai chi (Antam, Bean, Bawkbawn, Bawrhsaia be, Capsicum, Dhania, Mai, Parbawr, Tomato, Thingfanghma) a sem a, Aizawl North-II bialtu MLA, Dr. Vanlalthlana pawhin hemi zan hian bial chhung veng hrang hranga LLTF te hnenah thlai chi hrang hrang (Feren antam, Bawkbawn, Mai, Palak (spinach), Bawrhsaiabe, Bean, French Bean, Tomato, Capsicum, Dhania, Changkha) te semin, a kui tiahna tur polypot lian chi 3000 chuang a sem tel bawk a. Heng te hi Village &Local Level Task Force te hian mipui te hnenah an sem leh dawn a ni.

Mi 84 te sample lak a ni tawh
Coronavirus laka Mizoram himna tura hma lakna kal zelah nimin tlai thleng khan khualzin mi 64,822 te enfiah ni tawhin Mizoram pumah mi 84 te Sample chu Laboratory-a enfiah tura lak a ni tawh bawk a. Heng mi 84 result hi hriat kim vek ni tawhin COVID-19 vei hmuhchhuah belh an la awm lo a, COVID-19 vei hmuhchhuah tawh pawh a dinhmun a ziaawm zel bawk.

MPC in sawrkar an phut
MPC Party chuan nitin eichawp zawnga khawsa ten COVID-19 Lockdown avanga ei leh barah te harsatna an pumpelh theih nana Local & Village Level Task Force te theihtawp chhuaha hma an lakna zarah Vawiin thlengin Zoram pumah chhuan-chham kan la awmlo nia sawiin, lawmawm an tih thu an sawi a. Chutihrual chuan COVID-19 den-chhena CM Relief Fund-a sum lut atangin Local &Village Level Task Force te hnathawhna atana tul leh pawimawh ah sum thahnem zawk thehchhuak mawlh mawlh turin sawrkar chu an phut bawk.

MJA in CM Relief Fund hlan
Mizoram Journalists' Association (MJA) chuan COVID-19 dona a sawrkar hmalakna tawiawmna atan nimin khan Chief Minister's Relief Fund -ah Rs.50,000/- an chhunglut a, he sum hi MJA General Hqrs. President, Zonun-sanga Khiangte chuan Addl. CS to CM, JC. Ram-thanga, IAS hnenah a hlan a. MJA President chuan sawrkar hmalakna an puih ve na chu a sumfai chuan beitham te ni mah se, he hri laka Mizoram mipui tanhona ah hian MJA pawh a bang bik lo a ni tih lantirna a ni tih a sawi.

Central YMA in ngenna siam
Central YMA chuan Lockdown kan hman avangin Dawr lian awm ve lohna Veng tam takin nitin ei leh in mamawh lam kawngah harsatna an tawk mek nia an hriat thu sawiin, Dawr lian awmna Veng Branch YMA te chu Branch dangte mamawh lamkhawmna kawngah harsatna siamtu ni lova tanpuitu ni theuh turin an ngen.

MBSE in Exam buatsaih tum
Mizoram Board of School Education (MBSE) chuan MBSE hnuaia HSSLC (pawl 12) exam mekte tan sawrkar in Lockdown a tihtawp veleh Exam hi chhunzawm theih tura buatsaih a ni dawn tih thuchhuah siama tarlangin, Centre Superintendent te chu Exam hun tur hi lo ngai-chang reng turin a hriattir a. Exam inbuatsaihna atan hian chawlhkar khat tal hun pek a nih tur thu a tarlang bawk.

COVID-19 vei an pung zel
India ramchhunga nimin thleng khan CO-VID-19 vei chhinchhiah mi 5734 an tling tawh a, heng zingah hian enkawl dam mi 472 leh thihpui mi 166 an awm tawh bawk. Maharastra chu State mal-a COVID-19 vei tamna ber niin mi 1297 zetin he hrileng hi an vei tawh a ni.

Comments

Chhiar Hlawhte