Chanchin thar thenkhat :

PPE chungchang sawifiah
COVID-19 Medical Operational Team Chairman, Dr. ZR. Thiamsanga MLA chuan India ramah COVID-19 positive patient kan neih hnu khan Personal Protective Equipment (PPE) inchuhna a nasa hle tih sawiin, Mizoram Sawrkar pawhin a hnathawkte an him theih nan rang takin hma a la nghal tih a sawi a. Delhi leh Guwahati Mizoram House a hnathawkten theihtawp chhuah a an zawn hnuin engemaw zat hmuh a nih thu leh Mizoram atanga mahni ngei zuk kala, zuk enfiaha, duh thlang thei pawh kan nih loh avangin kan hmuh chhun, a awm ang ang chu harsa takin chanloh hlauin hmanhmawh takin lak khawm a nih thu a sawi a. Hetianga kan mamawhna a san em avanga hnawhsarum taka lakkhawm anih avangin a tha leh thalo pawh thliar theih a nih loh thu sawiin, duhthusam tlinglo te pawh alo tel nual niin a sawi a. A tha leh him tura ngaih te chu damlo enkawltu te ber hman tur atan dah a nih thu leh duhthusam lo te pawh a him theih dan tur bera thuamthat mek zel a nih thu a sawi bawk.
Lawngtlai-ah Sangha zuar
COVID-19 vanga inkharkhip chhunga mipui ten an mamawh ang ei tur tha an hmuh theih nana Lawngtlai District Supply Chain hmalakna peng khat atan nimin khan Fisheries Department chuan lawngtlai-ah Sangha khawitute Sangha thar an hralhchhuak a, heng Sangha te hi Bungtlang South a tharchhuah niin a vawikhatna atan quintal 0.70 lak phawt a ni a, LADC sawrkar-in Sangha man a bithliah angin, kg 1 hi Rs. 400-a hralh a ni a, karleh-ah hralhchhuah leh tum a ni ang.
Palak bial fangkual mek
Palak bialtu MLA, KT. Rokhawm chuan Zirtawpni atang khan a bial chhung khaw hrang hrang fangin Village Level Task Force te hnenah Mask,Kutkawr leh Hand Sanitizer te a sem a, a bial mipuite chu tunlaia hri leng mek laka kan him theih nan Sawrkar leh Task Force te thu zawm a, tihtur an tih leh tihloh tur an tih te zawm tha turin a chah bawk.
Nasa lehzuala hmalak duh
Mizoram Pradesh Congress Committee (MP-CC) chuan ni 14 zet inkharkhip chhunga Mizoram-a COVID-19 vei hmuhchhuah belh a ni lo chu lawm-awm an tih thu sawiin, thenawm State-ah a vei an pun zel si avangin ramri venhimna lamah sawrkar chu nasa lehzuala hma la tura an duh thu an sawi.
Minister in chah niin sawi
BJP Mizoram Pradesh chuan an President, Vanlalhmuaka chu DoNER Minister, Dr. Jitendra Singh chuan Phone-a bia in, DoNER atanga Mizoram tana COVID-19 dona tur bik atana pawisa an rawn pek a nihna tur ang taka hman a nih theih nana lo enpui turin a chah tih an sawi.

Comments

Chhiar Hlawhte