Chanchin thar thenkhat :

Cabinet Secretary in kawm

Nimin khan Cabinet Secretary, Rajiv Gauba chuan State tina Chief Secretary leh DGP te chu Video Conferencing kaltlangin a kawm a, State zawng zawngte chu tunhnaia Tablighi Jamat inhmuhkhawmna tel te chu COVID-19 a darh lohna turin uluk taka chhui chhuak vek tura hriattir an ni. Tunhnaiah Tablighi Jamat a tel turin rampawn lam mite VISA kalphung bawhchhiain India-ah an rawn lut tih hriat a nih thu leh heng dan bawh-chhetute chungah hian a tul anga hma la turin State thuneitute chu hriattir an ni bawk. Hei bakah hian State te chu Prime Minister's Garib Kalyan Yojana hnuaiah beneficiaries te pawisa pe tura tih niin State chhunga bungraw phurh dan mumal tak leh chatlak lova kalpui tura hriattir an ni bawk.
MLA ten sum thawhkhawm
Mizoram Legislative Assembly-a Member (MLA) 40 te chuan COVID-19 dona atan an hlawh atangin CM Relief Fund-ah Rs. 21,26,000/- chu nimin khan Chief Minister, Zoramthanga hnenah an pe a, hemi atan hian Mizoram Chief Minister, Deputy Chief Minister, Speaker, Cabinet Ministers, Deputy Speaker, Minister of States, Dy. Govt. Chief Whip leh Chairman, Lunglei High Power Committee te chuan an thla chanve hlawh theuh pein MLA ten kar khat hlawh theuh an thawhkhawm a ni. He hunah hian Chief Minister chuan MLA ten an vaia hetianga hma an la ho thei chu lawmawm a tih thu a sawi a, Assembly Speaker Lalrinliana Sailo pawhin COVID-19 do kawngah sawrkar hmalakna chu lawmawm a tih thu a sawi bawk.
VLTF harsatna sutkian sak
Serchhip District chhung Hmuntha khuaa Village Level Task Force chuan an khaw himna tura ruahmanna an siam chu sawrkar thuneitu ten an palzut nia hriain niminpiah khan Task Force hi an thiat tih an sawi a. Amaherawh chu bialtu MLA leh Dy. Speaker, Er. Lalrinawma hova hmalak zui a nih hnuah harsatna te hi chingfelin nimin khan hna hi thawh chhunzawm leh a ni.
Dialysis khawl bun enpui
COVID-19 Medical Operational Team te chuan niminpiah khan an Chairman, Dr. ZR. Thiam-sanga MLA hovin Zoram Medical College-a Dialysis khawl bun chhoh mek an enpui a. ZMC-ah hian Dialysis khawl pali a awm a, a vai hian hman theih nghal tura ruahmanna kalpui mek a ni a, a tul ang ang chak taka hma la turin hnathawk te fuih pahin leh an mamawh turte leh a tul dang te an lo thlen bawk a ni.
Mipuite inkhung zel turin duh
MNF Thalaite chuan Coronavirus (Covid-19) chuan kan ram a lo thleng ve ta reng mai tih sawiin, Sawrkar hmalaknain ni engemaw zat inkhar-khip ni tawhin mipui vantlang nunphung a buai chho zel tih an sawi a. Amaherawh chu kan hma lamah enge lo thleng dawn hriat ala nih loh avangin sawrkar thupek zah leh zawmin, chi-ai chuang si lova mipuite chu inkhung zel tura an duh thu an sawi bawk.
ZPM in sawichhuah tha ti
ZPM Thalaite chuan Coronavirus (SARS-CoV-2) darh mek dovin Mizoram-ah sawrkar, Kohhran, khawtlang hruaitute leh mipuite tang-rualin hma kan la mek tih sawiin, duhkhawp lo tam takah midangin ngawih an chuh laia MNF Thalai in Sawrkar hmalakna a tha ber niawma an fak chiam avangin thil tha tawklo te sawi-chhuah chu tha zawkah an ngaih thu an sawi.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn