Chanchin thar thenkhat :

Cold Storage siamna tur en

Coronavirus hrileng meka Vegetable Supply Chain kalpui zelna atana Sihphir tlangdung a kuthnatawktu ten an thlai thar an dahthatna tur leh felfai zawka Sihphir hmun-a Cold Storage changtlung tak siam dan tur chu nimin khan Horticultural Development Board Vice Chairman, Dr. F. Lalnunmawia MLA chuan a en a. He hunah hian Dr. F. Lalnunmawia chuan he hripui hian min ti buai viau mahse kuthnathawktu ten mumal zawk leh hlawk zawka thlai an hralhna tur (market system) sawrkarin ruahmanna siamin, Vegetable Supply Chain pawh tha zawka kalpui zel a nih thu a sawi a, he kan buaina hian eng chen nge min nghawng dawn a hriat loh avangin buh leh bal tharchhuah kawngah chhungtin te mahni intodelh tura tan kan lak a tul thu a sawi bawk.

Melbuk in midang tan hlan

Mizoram sawrkar in COVID-19 dona tura CM Relief Fund atanga Village Level Task Force te hnena sum a ruahman chu VLTF hrang hrang ah semchhuah mek niin Champhai District chhung Melbuk VLTF chuan he pawisa pekchhuah hi mamawh viau mah se anmahni aia mamawh zawk khaw dang an ken theih thu an sawi hnuah nimin khan an sum dawn Rs. 10,000/- chu COVID-19 dona atan leh a tul ang apianga hman turin Chief Minister Relief Fund-ah an chhunglut leh nghal a. He sum hi Champhai SDO (Sadar), Lalnunfela Chhangte hnenah Melbuk VC Treasurer, Keikhawtinthanga chuan a hlan a ni.

Bairabi-ah chenna In chhia

Niminpiah tlai-a thli leh ruah thawk in Ko-lasib District chhung Bairabi khuaah chenna In 10 zet tichhiain Church of God Israel Kohhran Biak In hulhliap zar thenkhat a tichhe bawk a, vanneihthlak takin mihring thi leh hliam an awmlo thung. Heng vanduaina tawk te hi nimin khan bialtu MLA, K. Lalrinliana chuan tlawhin Rs. 5000/- leh Silpauline pakhat theuh a pe a, sawrkar atanga tanpuina awm thei ang te pek thuai an nih tur thu a sawi bawk.

Myanmar ramri-a duty te tlawh

Lawngtlai East bialtu MLA leh Agriculture Development Board Vice Chairman, H. Biakzauva MLA chuan nimin khan a bial chhung Indo-Myan-mar International Border, Saisihchhuah-a COVID-19 Duty Post chu a tlawh a, Myanmar leh Mizoram (India) inkalpawhna Saisihchhuah kai chu mi tam takin an paltlang thin a nih avangin Duty te pawhin uluk taka an hna an thawh a tul thu sawiin, tlawm-ngai taka theihtawp chhuaha an hna hi thawk turin helai hmuna Duty te chu a chah bawk. He hunah hian bialtu MLA hian Saisihchhuah a duty te hman turin Glove, Mask, Sanitizer leh Cinpaulin te a pe a, Pangkhua leh Saisihchhuah inkara MAP leh Assam Rifles duty te pawh tlawhin duty te himna tur hmanrua engemaw zat a pe bawk.

Sawrkar hmalakna ah lawm

MPC Party chuan COVID-19 dona kawnga tun thlenga Mizoram sawrkar hmalakna chu lawmawm an tih thu nimin khan thuchhuah siamin an tarlang a. COVID-19 laka Mizo-ram kan him nan leh kan dona peng hrang hranga Mizoram Sawrkar hmalakna ten rah tha a chhuah mek zel chuan, sawrkar hmalakna mipuiin kan tawiawm thatzia a tilang chiang hle ah an ngaih thu tarlangin, Mizo mipuite tanrualna leh thu awihna-ah lawmthu an sawi a. Ramri dep-a duty Task Force leh Police Force ten hnianghnar taka Ration an dawn theih nan leh, an hriselna te pawh uluk taka enkawl a nih theih nan a chhun a zan-a chenchilhtu tur Doctor leh nurse ruahman turin sawrkar chu an phut bawk.

Tangkhang 978 awm mek

Mizoram-ah COVID-19 avanga Lockdown kalpui a nih hnuah State pawn lam mi hnathawk a la tangkhang mi 978 an awm mek. Mizoram State pawn atanga Mizoram chhunga hnathawk la tangkhang (Migrant workers) zawnchhuah hna hi LESDE Department chuan buaipui mekin Inter-State Migrant workmen Act, 1979 hnuaia Registration nei te chu an mi chhawrte detail kimchang dilin Ministry of Labour & Employment, Govt. of India-ah report pek zel niin hetiang mi chhawr nei te chu mahni bialtu Registering Office-a hriattir tura ngen an ni bawk.

Tanpuina buaipui man tu hnenah mah pek ngailo

Mizoram Building and Other Construction Workers’ Welfare Board chuan tunlai-a hri leng mek avanga tanpuina pekchhuah mekah tute hnenah mah buaipuina man pek a ngailo tih an sawi. Nimin a thuchhuah an siamah tunlai hrileng mek Mizo-ram Building and Other Construction Workers’ Welfare Board chuan COVID-19 avanga an Board member harsatna tawk mek te tanpuina atan Labour Employment , Skill Development & Entrepreneurship (LESDE) Department hnuaia Welfare Board a hnathawktu in register te hnenah April 7, 2020 atang khan Rs. 3000/- theuh pek tura a ruahman angin a tahtawl-a sem mek a nih thu leh tanpuina hi Bank Account kaltlangin a dawng turte hnenah Direct Benefit Transfer-a pek a nih thu sawiin, tanpuina dawng turte hian tute hnenah mah buaipui man sum pek a ngailo tih an sawi a ni.