Thutkhawm tawp Ni-ah Bill hrang hrang pass a ni

Mizoram Legislative Assembly 8-na thutkhawm nimin a neih ah sawrkar Bill pawimawh hrang hrangte pawm a ni.

Assembly Speaker, Lalrinliana Sailo kaihhruai he thutkhawm ah hian Taxation Minister, Lalchamliana chuan 'The Mizoram Goods & Services Tax (Third Amendment) Bill, 2020' House pawmpui turin a pharh a, Revenue Minister Lalruatkima pawhin 'The Mizoram (Land Revenue) 2nd Amendment Bill, 2020' a pu lut bawk. Heng bakah hian 'The Mizoram Animal Slaughter (Amendment) Bill, 2020' chu AH&Vety Minister, Dr. K. Beichhua-a putluh leh Tourism Minister, Robert Romawia Royte Bill putluh, 'The Mizoram (Registration of Tourist Trade) Bill, 2020' te chu House-in a sawiho hnuah lungrual taka pass a ni.

Nimin-a Bill thar putluh 'The Mizoram Registration of Tourist Trade Bill, 2020' hi khualzinte buaipuitu Tour Operator te, mimal te, Travel Agent leh Tour Guide te in register-na tur leh a kaihhnawih thil enkawlna tura duan a ni a, khualzinte thlenna leh eina hmun Hotel leh Restaurant te zawm tur inkaihhruaina leh Dan zawmlo te hrem theihna tura duan a ni.

Minister-te Bill pali (4) putluh bakah Home Minister, Lalchamliana chuan, India Consititution (126th Amendment) Bill, 2019 nikum lama Lok Sabha leh Rajya Sabha-a pass tawh, Scheduled Tribe leh Scheduled Caste bakah Anglo-Indian te hamthatna atana reservation pek chhunzawm zelna tur Bill chu a pulut a, hei hi Parliament-in pass tawh mah se, State sawrkarin a pass ve a ngaih avangin Home Minister hian a pulut a, House chuan he Motion hi lungrual takin a pass a ni.