Latest News

Phuldungsei Zampui VC thar pek an ni

LAD Minister, K. Lalrinliana chuan Phuldungsei Zampui Village Council thar sawrkarin a pe tih Assembly House a hrilh.
Assembly Budget Session nimin a chhunzawm a zawhna leh chhanna hunah LAD Minister chuan, Phuldungsei Zampui chhuahlam chu Mizoram a nih thu leh tlak lam chu Tripura a nih thu a sawi a, he khua hi Chief Minister Zoramthanga hovin Official te nen an tlawh tawh tih a sawi a, Phuldungsei Zampui khawchhungah Tripura State kawng a kaltlang a, Mizo leh Bru te chenna hmun a ni tih a sawi bawk.
LAD Minister chuan Mizoram lamah Primary School a awm thu leh khaw tawntirhah Tripura Rifles Camp a awm thu te, Tripura sawrkar enkawl Sub-Center, Forest Quarters leh Middle School te a awm bakah Tourist Lodge sak a nih thu te a sawi a, hetihlai hian Tripura sawrkarin chhuahlam ram te chu a teh sak ngam lova, ram neitu mimal te chu inhrethiamtawnin an awm thu leh, hun lo kal zel turah Tripura lamin ta neihin harsatna an siam an hlauhthawn avangin VC hran chu pek an ni tih a sawi bawk.
LAD Minister chuan tun dinhmunah LAD hnuaiah VC 534 a awm thu leh ziaka chhinchhiah an neih chinah Unauthorise VC 18 an neih thu a sawi bawk.

Comments

Popular News (Last 30 Days)