Thuthar thehdarhtu ten bawlhhlawh sawngbawl dan leh Environment humhalh chungchang an zirho

Serchhip-a Urban Development and Poverty Alleviation Department buatsaihin nimin khan Serchhip-ah 'District Level Sensitization Programme on Waste Management and Environmental Conservation for Journalist Member' neih niin bawlhhlawh sawngbawlna tura thil pawimawh hrang hrang zirho a ni.

Serchhip-a District Urban Development Officer (DUDO) Office Chamber-a he hun hman hi Serchhip DUDO, Vanthangpuii chuan kaihhruaiin he hun an buatsaih hi February thla a neih tum ni tawh mah se harsatna hrang hrang a awm avangin tunah a hlawhtlinna an hmu thei ta chauh tih a sawi a. UD&PA Department chu Mizoram-ah Department naupang te niin Serchhip-ah phei chuan September, 2017-ah Pisa hrang neia an inhawn chauh thu a sawi a. An Department in hma an lakna tlangpui sawiin, CSS pathum (3) an kalpui thu a sawi a. Swachh Bharat Mission hnuaiah khawpui faina atana hma an lak thu te, Housing for All hnuaiah mirethei chenna In neilo ten In an neih vek theihna tura hma an lak thu leh National Rural Livelihood Mission (NRLM) hnuaiah khawpui a chengte hmasawnna turin Component 5 hnuaiah hma an lak mek thu a sawi a. He huna Sensitization Programme an buatsaih chuan kan bawlhhlawh senghawi dan leh ramngaw humhalhna kawngah hmasawnna a thlen ngei a beisei thu a sawi bawk.
He hunah hian R. Lalnunhlima, Range Officer, EF&CC Buarpui Range chu Resource Person-ah hman niin bawlhhlawh chi hrang hrang then hran dan te, bawlhhlawh sawngbawl dan chi hrang hrang leh bawlhhlawh atanga leitha siam dan te sawiin, Mihring kan khawsak changkang zel avanga kan vel-a thing leh Mau lo chereu zel te, hemi avanga kan sik leh sa lo danglam zel dan te leh kan ramngaw te kan humhalh a pawimawhna hrang hrangte a sawi bawk.
Hemi hnu hian Lallawmzuali, Manager, NULM Serchhip chuan 'Solid Waste Management Rules, 2016' chungchang sawifiahin, he Dan hnuaia khawpui faina atana hma an lakna hrang hrangte, mipuite tana hriat tur pawimawh hrang hrang leh bawlhhlawh sawngbawl dan tura hma an lakna te a sawi bawk a. Serchhip District Urban Development Officer, Vanthangpuii pawhin Solid Waste Management Centre din tura hma an lakna te sawiin, Solid Waste Management Centre hi Urban Town-ah neih vek tur a nih angin Serchhip District chhunga Urban Town pathum-ah pawh ram neih vek a nih tawh thu leh Serchhip-ah hmalak mek a nih thu a sawi a. F. Lalruatkimi, Inspector of Sanitation pawhin khawpui faina tura hma an lakna hrang hrangte a sawi bawk.
He hunah hian sawihona hun huamzau taka neih niin he hunah hian Serchhip, Thenzawl leh North Vanlaiphai atangin thuthar theh-darhtute an tel bawk a ni.

Comments

Chhiar Hlawhte