Chanchin tawi


MJA ten hmalakna tlawh

Mizoram sawrkar-a Information & Public Relation Department in thuthar thehdarhtute tana SEDP hnuaia Press Project Site Visit buatsaih mekah Lawngtlai District MJA te chuan niminpiah khan India leh Myanmar insumdawn tawnna tur Kaladan Multi-Modal Transit Transport Project (KMM-TTP) kawngpui laih mek leh Lawngtlai District chhung, Hruitezawl khaw bul Chhimtuipui lui-a 'lung mak' te an tlawh a. KMMTTP kawng hi KM 88-a thui niin KM 81.500 chu blacktop a ni tawh a, Lei (bridge) pariat (8) dawh turah paruk (6) thawh mek niin a hmasa ber leh a tawp ber ami tur chu design mek a ni bawk. He Project thawh mekah hian hna thawh tur atanga zaa 94.20 zawh ni tawhin Lei dawh tihloh hna dang zawng chu kumin ah zawhfel tum a ni.

Central YMA in lawmawm ti
Central YMA chuan Corona Virus (Covid-19) darh avanga khawvel pumin harsatna kan tawh mek chungchangah Mizoram Sawrkar-in invenna atan ramri inkalpawhtawnna a khuahkhirh chu lawmawm an tih thu thuchhuah siama tar-langin, Sub-Hqrs./Group/Branch YMA te chu Sawrkar in ruahmanna a siamte tawiawm turin an ngen a. Heng ruahmanna leh hri leng denchhena mipui mamawhte a man aia sanga hralh lo tur leh chheprelh lo tura sumdawng te chu ngenin, mipui pawhin mahni mamawh aia tam lei lo turin a ngen nghal bawk.

Saitual-ah Chapchar Kut
Saitual District pum huapin nimin khan a vawi khatna atan Chapchar Kut chu Saitual Public Playground-ah hman a ni a, he hun hi Lengteng bialtu MLA leh Human Resources Development Board Vice Chairman, L. Thangmawia chuan Kut Pa nia hmanpuiin bialtu MLA, R. Lalzirliana chu Kut thlengtu a ni a, he hunah hian Saitual District chhunga khaw hrang hrangte chu tel tura sawm niin an tel tha hle a, khaw hrang hrangte hian Item chi hrang hrang, hmundang-a la entir ngai lemloh chi hrang hrang an entir bawk a ni.

Thenzawl-ah mi 1 khung hrang
Tunlai-a Coronavirus leng mek avangin Serchhip District chhung, Thenzawl CHC-ah mi pakhat chu dahhran (Quarantine) mek a ni a. Thudawn danin tuna an dahhran mek hi Japan-a hnathawk-a awm niin Inrinni khan New Delhi atanga Aizawl rawn thlengin Thenzawl Joint YMA hruaitute leh an chhungkua in an sawiho hnuah Pathianni tlai atang khan dah-hran a ni a. Thenzawl CHC-a Doctor te chuan he thil avang hian mipuite tan chi-ai na tur a awmloh thu leh he an dahhran pawh hian dam-lohna leh harsatna a neilo tih sawiin, fimkhur thu ah ni 14 dahhran tur a nih thu an sawi bawk.
Music Festival buatsaih rel
Mizoram Youth Commission (MYC) Chairman Dr. Vanlaltanpuia hova niminpiah a MYC Official leh sawmbik te thukhawm chuan Mizo thalai music lama tuimi te tan Music Festival leh inelna buatsaih an rel a. Beat Group, Solo, Mizo music instrument exhibition, Acapella leh Hip hop Category-ah te hian elna buatsaih tum a ni a, hetiang lam a tuimi te chu lo inbuatsaih turin MYC chuan an ngen a. Inenlna a titha te chu NH70 leh Orange Festival-ah te, IIT Guwahati Festival-ah te sponsored a tum bawk a ni. Music Festival neih hun tur chu MYC in an la puang lova, hun reilotea buatsaih tum a ni.

Supply Department in mipui leh dawrkar te hriattir
Mizoram Sawrkar, Food,Civil Supplies & Consumer Affairs Department chuan thuchhuah siamin nitin mamawh thil zuar leh dawrkaite chu an thil zawrh chheprelh lo tur leh thil man chhiar san belh loh turin a hriattir a. He hriattirna zawmlo te chu The Prevention of Black Marketing and Maintenance of Supplies of Essential Comodities Act 1980 leh The Consumer Protection Act 2019 hmanga hrem anni ang tih mipuite leh dawrkaite an hriattir bawk.

Comments

Chhiar Hlawhte