Latest News

Thu diklo thehdarh thu ah Police ten Serchhip-ah mi 4 an man

Mizoram-ah Coronavirus vei hmuhchhuah an awm anga thu diklo Social Media-a thehdarh chungchang ah Serchhip Police te chuan nizan hmasa khan Serchhip-a mi 4 an man a, Bail-a chhuah leh nghal an ni. Tunhnaiah Social Media (WhatsApp)-ah ‘Ka hmelhriat hnaivai Health dept (Civil Hosp) a thawk atanga chanchin ka hriat dan in tunah hian Covid19 confirmed case pakhat Aizawl ah vawiin khan hriat a ni a. Kan chhungte leh thianthra te kan lo fimkhur nan i in hrilh ang u’ tih chu Phone Number pakhat atanga thawnchhuah niin hei hi Group hrang hrangah thawn darh leh a ni a. Hei hi thu diklo a nih avang leh mipuite ti chiai thei a nih avangin hemi chungchang ah hian Aizawl Vaivakawn Police Station-ah thubuai ziahluh a ni a.
Hemi chungchang hi Police te chuan chhui zuiin niminpiah tlai thleng khan mi 11 an man tawh a, a mawhphurhtu zawn hna kal zelah nizan hmasa khan Serchhip-a he thu lo thehdarhtu mi 4 te chu Police te chuan manin heng mite hi thubuai siam sak nghal an ni a, he thubuai hi bail theih a nih angin heng mite hi bail a chhuah leh nghal vek an ni. Mizoram Police te chuan Social Media chu tangkai taka hman theih a nih laiin thu diklo thehdarh leh thu diklo hmanga mipui ti chi-ai thei thu thehdarh chu Dan bawhchhiatna a nih avangin mipuite chu fimkhur turin an chah nghal bawk.

Comments

Popular News (Last 30 Days)