Silai tawlhruk 632 man tawh

Kum 2004 atanga tun sawrkar kum kal mek thlengin Mizoram-ah dan lova Silai tawlhruk 632 zet chu Police ten an man tawh.

Assembly Budget Session neih mekah eptu member, Lal-rindika Ralte zawhna ziaka chhanga he thu hi sawiin Home Minister, Lalchamliana chuan sawrkar kum 2004-05 atanga tun sawrkar kum kal mek, 2019-20 thlengin Mizoram Police te'n silai chi hrang hrang 632 leh a mu 47510 an man tawh thu hi a tarlang a. Heng Silai an man te hi AK-47 Rifle, .22 Pistol, 5.56 mm Rifle, 7.62 mm Rifles, Glock Pistol, 7.62 LMG, 5.56 Browning Automatic Rifle (CBAR), AK-56, G-3 Rifle, 9 mm Pistol, MA-4 Pistol, MA-3, MK II (AK-47 type), .22 Pistol (Colt), 9mm Carbine, .45 Pistol, SBBL Gun, Pistol (Local made with silencer), Airgun (Tomahawk) leh Airgun (HAT-SAN) te a ni.

Zawhna chhanna atanga tarlan a nih danin, he kum 15 chhunga silai man tam ber kum chu 2011-12 chhung kha niin, silai 91 leh a mu 243 an man a, an man tlem ber kum chu 2005-06 chhung kha niin, hemi kum hian silai 9 leh a mu 201 man a ni thung.

Home Minister, Lalchamliana chuan, silai neitu nia puhte zingah thubuai avanga lung In a tang (convict) leh Court-a thubuai nei mek lung In-a awm mi 32 an awm thu tarlangin, thiam-loh chantir tawhte hi mi 8 an nih thu leh Court-in an thubuai a ngaihtuah mekte chu 24 an nih thu a sawi a. Ralthuam neitu nia puh thiamloh chantir tawh, lung In-a tang mek mi 8 te hi Myanmar mi vek an ni a, Court-in an thubuai a ngaihtuah mek zingah pawh hian Myanmar lam mi engemaw zat an awm bawk. Home Minister chuan Mizo-ram kaltlanga ralthuam tawlhruk zawng zawng chu man vek an nih leh nih loh hriat theih a nih loh thu leh man zingah thiam changa chhuak an awm thu te pawh a tarlang bawk.