Rualbanlo mi 72 in sawrkar hna an hmu tawh

Mizoram chhunga pianphunga rualbanlo mi 72-in sawrkar hna an hmu tawh.

Mizoram Legislative Assembly Budget Session neih mekah Social Welfare Minister, Dr. K. Beichhua chuan Office of the Commissioner for Persons with Disabilities-in kum khat chhunga an hnathawh dan tarlanna, Annual Report 2018-19 chu pharhin he thu hi tarlan a ni a. he Annual Report-a tarlan a nih dan chuan Mizoram sawrkar hnuaia Department tin chu rualbanlote tana hna 4% hauh chungchangah hriattirna pein, pianphunga rualbanlo te tana an hna hauhte luah khah a nih dan zawh thin a ni. Department 61-in hei hi chhangin an dinhmun an hrilh a, chuta a lan dan chuan, nikum (2019) September thleng khan sawrkar hna ah hian mi 72 an lut tawh a, heng te hi Group 'A', 'B', 'C' leh 'D' hna te a ni.

He Report bu-ah hian sawrkarin pianphunga rualbanlote tana a thawh dan te tarlan a ni a, In (building) 59-ah rualbanlote Wheelchair-a an kal theihna turin ramp leh lift te dah a ni tawh tih a lang a. Khaw hmu lo, taksa chet theilo leh rilru lama harsatna neite chu MST Bus-ah a thlawnin an chuang thei a, Social Welfare Department-in ID Card an pek pianphunga rualbanlo zawng zawngte chu Aizawl leh Lunglei-ah te Sawrkar Bus (MST)-ah chuanman 50% zela tlawm-a chuantir an ni. Pianphunga rualbanlo, sawrkar hnathawkte chu anmahni bakah Attendant/Escort pakhat nen Rel leh Thlawhna chuanman a man tlawma pek an ni bawk.

Hei bakah hian sawrkar atanga tanpuina sum hmu thin zirna In, Higher Education bikah chuan pianphunga rualbanlote tan seat 5% hauh tur a ni a, an tana siam Special School-ah zirlaibu leh uniform bakah an mamawh dangte a thlawna pe-a lehkha zirtir an ni. Special School hi Mizoram-ah pariat awm mekin Aizawl District-ah pathum, Lunglei District-ah pakhat, Serchhip District-ah pakhat, Kolasib District-ah pahnih leh Siaha District-ah pakhat a awm a ni.

SSA leh RMSA hnuaiah pianphunga rualbanlote hi Zirlaibu, Uniform leh hmanraw dangte a thlawna pein lehkha zirtir an ni bawk a. SSA hnuaiah zirlai 3158 leh RMSA hnuaiah zirlai 1410 an awm nia chhin-chhiah a ni bawk a. Report bu-a a lan danin, Secondary School (sawrkar) 199, RMSA School 92 leh Higher Secondary School (sawrkar) 21-ah pianphunga rualban lo zirlai an awm a ni.