Lengpui-ah IndiGo service tan

Regional Connectivity Scheme (UDAN-RCS) hnuaiah IndiGo thlawhna chu Lengpui Airport-ah a Service tawh dawn a, IndiGo flight hi Aizawl - Guwahati inkar service tur niin Agartala pawh a thlawk tel dawn a ni.
IndiGo flight Service lawmna inkhawm hi Inrinni khan Lengpui Airport-ah buatsaih niin Chief Minister, Zoram-thanga chuan a hmanpui a, he hunah hian Chief Minister chuan Lengpui Airport in Airline Service thar a nei belh chu lawmawm a tih thu sawiin, Mizoram in a chhawr tangkai hle tur thu a sawi a. Guwahati nen a inkalpawhna service a awm belh mai bakah Lengpui atanga thlawk la awm ngailo, Agartala khawpui pawh IndiGo Service hian a telh chu lawmawm a tih thu a sawi a. Lengpui Airport chu changtlung zawka siam turin hmalakna a kal mek zel thu pawh Chief Minister chuan sawiin, Lengpui atangin India ram khawpui direct flight a la awm a beisei thu a sawi bawk.
He hunah hian IndiGo Airlines Vice Pre-sident, Vijay Matta chuan Aizawl thleng theia an hmalakna an zauh ta chu lawmawm a tih thu sawiin, Lengpui Airport chu RCS hmalakna hnuaia India hmarchhak state zinga state paruk-a an service na tur niin, Aizawl chu IndiGo thlawhna Domestic destination 62-na leh a pumpui chuan destination 85-na a nih thu a sawi a. Kolkata leh Delhi flight te pawh a remchan dan anga la siam zel an beisei thu a sawi bawk.
IndiGo hi Airline chuan man tlawm, Inter-Globe Aviation Ltd. company peng pakhat a ni a. Haryana-ah Headquarter neiin thlawhna 255 service an nei a. Nitin flight 1500 chuang an nei a. Aizawl - Agartala - Guwahati flight hi ATR thawhna a ni.
Lengpui Airport a IndiGo flight service thar lawmna inkhawm hi Adviser to Chief Minister, C. Lalramzauva chuan kaihruaiinMLA leh Civil Aviation Principal Consultant bakah Airport Authority of India (AAI) Regional Executive Director te pawh an tel a ni.

Comments

Chhiar Hlawhte