Sihhmui Lei dawhna tur chhunzawm theih a nih loh thu Chief Minister in a sawi

Sihhmui kai Lei (Bailey Bridge) thlakna tura a bula Concret Lei dawh tum chu a innghahna lei a that tawk loh avangin dawh chhunzawm theih a ni lo tih PWD changtu Chief Minister, Zoramthanga'n Assembly House a hrilh.

Nimin-a Assembly inkhawma zawh leh chhanna hunah Chief Minister chuan, Sihhmui kai Lei (Bridge) thar dawhna tur Central ah an nawr thu leh pek pawh an tum nia an hriat thu a sawi a, hetihrual hian Lei thlakna tura tuna structure dinna thalo chungchangah Central lam pawh an thin a rim thu a sawi a, a tul anga lo enfiah turin an ti tih sawiin, a tir atanga Foundation fumfe lova Lei dawh tum a ni chu enfiah a ngaih thu a sawi.

Chief Minister chuan, Lei thar dawhna tur an hmuh hmain tuna Lei hmanlai chu dim taka hman a ngai tih a sawi a, Bairabi-a mikhual thlenna tur PWD IB emaw thil dang emaw awm lo chu sawrkar kumthar ah a theih anga hmalak a nih tur thu a sawi a, Teirei Lei pawh tih chak a, hman theih a ni em tih an enfiah tur thu te, Lunglei helna kawng siamna tur sum an hmuh tawh thu te a sawi a, hetihlai hian zangnadawmna pek chungchang chu an buaina a nih thu sawiin, sawrkar kumthar ah bawhzui tum a nih thu a sawi bawk.