Sial vulh tihlarna atan Serchhip District-a Leng khua-ah Se Kupui hman a ni

Mizoram sawrkar-a AH & Vety Department leh Indian Council of Agricultural Research (ICAR) hnuaia National Research Centre on Mithun (NRC-M) te tangkawp buatsaihin nimin khan Leng khua ah ‘Se Kutpui’ hman a ni.
Sial vulhtute tihphurna leh Sial vulh chawilarna tura Serchhip District chhung, Leng khua a Se Kutpui (Mithun Mela) hi hun thum-ah then niin hun hmasa berah nimin zing khan Vantlang hmuh a Sial phochhuahna, Mithun Show neih a ni a, he hun hi Dr. Vanlalenga, Deputy Director, Livestock& Poultry Development (LPD) chuan kaihruaiin Leng, Sailulak, Riangtlei, Lungkawlh leh Vangtlang khua atangin Sial chi hrang hrang phochhuah a ni a, heng Sial te hi an kum azirin tehna hrang hrang - A pianphung, an mit fiah that tawk leh tawkloh te, an thluk vum invuah dan te, Sepui Hnute Bu that leh that loh te, An khup a tuah dan te uluk taka endik niin Sial tha thlanna neih niin Sial tha thlanchhuah te hi lawmman pek an ni a, AH&Vety Department te hian heng khuaa Sial vulhtute te tan Se liah tur chi (Salt) thahnem tak an pe vek bakah Leng khua Mithun Co-Operative Society (Sial Vulhtu Inzawmkhawm Pawl) te tan Se chi thlahtu tur Se pa pek an ni bawk.
Hemi hnu hian Leng Community Hall-ah hun hman chhunzawm niin he hun hi AH&Vety Director, Dr. Hmarkunga chuan khuallian niin a hmanpui a, Sial vulhtute tana sawrkar hmalakna hrang hrangte sawiin, he Kutpui hmang tura sawrkar hmalakna chuan rah tha a chhuah zel a beisei thu a sawi bawk. Hemi hnu chawhnu lamah ICAR (NRC-M) Medziphema, Nagaland leh AH & Vety Department a mithiamte hnen atangin Sial vulh leh enkawl dan hrang hrang zirhona neih a ni leh bawk a, he hunah hian Leng khua bakah Sial vulhna khaw hrang hrang atangin Sial vulhtu mi thahnem tak an tel a ni.

Comments

Chhiar Hlawhte