Serchhip-a Sa talhna hmun a awmna a hlat avangin Sa talhtu ten an hmang rihlo

Serchhip (Mualvawm)-a Slaughter House chu a awmna hla an tih deuh avanga Sa talhtu ten hmang rihlo mai an nih thu AH&Vety Minister, Dr. K. Beichhua chuan a sawi.

Mizoram Legislative Assembly Session neih mekah nimin khan rorellai Member, Er. H. Lalzirliana chuan Mizoram a Sa talhna In (Slaughter House) siam tawhna khua leh Zokhaw hmun hrang hrangah siam tumna a awm em? tih te zawtin AH&Vety Minister, Dr. K. Beichhua chuan Animal Husbandry & Veterinary Department-in Sa talhna In a sak tawhna te chu Bung Bangla, (Tuirial bul); Mualpui, Salem Veng, Aizawl; Brigade, Bawngkawn; Champhai (Khankawn bul); Lunglei, Electric Veng leh Serchhip (Mualvawm)-ah te anih thu sawiin, Zokhaw hmun hrang hranga Sa talhna In siam tumna a awm rihlo tih a sawi a. Serchhip bialtu MLA, Lalduhoma chuan Serchhip (Mualvawm)-a Slaughter House sak zawh tawh, hawn pawh hawn tawh chu engvanga tun thlenga hman tangkai ala nih loh chhan leh sawrkar in hman tangkai dan a ngaihtuah dawn em tih te zawtin AH & Vety Minister chuan Serchhip (Mualvawm)-a Slaughter House chu a awmna hla an tih deuh avanga sa talhtu ten hmang rih lo mai an nih thu a sawi a ni.

Lunglei-a ran talhna In, Slaughter House sa tu Contractor chu Department in a la hre thei lo tih Vety Minister, Dr. K. Beichhua chuan Assembly hrilhin, Lunglei Slaughter House chu kum 2013-a sak zawh tawh a nih thu a sawi a, a sa tu contractor chungchang chu Department pawhin a buaipui hle tiha sawi a. Lunglei Slaughter House hman a nih loh chhan chu sa sattuten a panna hla an tih vang leh a kalna senso sang an tih vang a nih thu a sawi a, Department in Sa talhna hmun a siam chhan chu Mipui ten Sa hrisel an ei a, ran hrisel eitur an neih theihna tur a ni a, hetihlai hian a talhtuten an hman duh loh chungchangah tihluihnaa an nawr theih bik loh thu a sawi bawk. AH & Vety Minister Dr. K Beichhua chuan, Lunglei Lungpuizawl-a Artui awp keuna sak mek chu zaa 90 zawh a ni tawh tih pawh Assembly-ah hian sawiin, hman theih a nih hunah chuan vawikhatah Artui 5000 vel awp keu thei tura ngaih a nih thu leh Artui-a chhim lam mamawh zaa 90 vel chu phuhru thei tura ngaih a nih thu a sawi bawk.