Lengpui Airport Terminal Building chu mi 2000 leng tura tihlen tum mek a ni

General Administration Department (GAD) changtu Chief Minister, Zoramthanga chuan Mizoram-ah khualzin veivak an pun chhoh zel avangin Lengpui Airport Terminal Building chu tumkhatah mi 2000 leng thei tura tihlen tum a nih thu a sawi.
Assembly Session neih mekah MNF member, Dr. ZR. Thiamsanga ziaka zawhna a chhanna ah GAD changtu Chief Minister chuan Mizoram-ah khualzin veivak an pun zel avangin Terminal Building chu tihlen tum a nih thu sawiin, “Tumkhat ah mi 2000 len theihna tura ruahman a ni,” a ti a. Lengpui Runway chak zawng chu 36 PCN a ni tih pawh sawiin, hemi avang hian Airbus 320 leh a dangte chuan Full load in an operate thei lo tih a sawi a, hemi avang hian Runway chakzawng (Strength) chu 56 PCN ah tih chak tum a ni tih a sawi.
GAD changtu Chief Minister chuan Terminal Building chhunga thuamthat ngai lai te, Waiting Shed siam that, Chaplain Office sak leh Car Parking Area cheitha turin ruahmanna siam a ni tih sawiin, Emergency emaw hijack awm thulha Thlawhna dahna tur, Isolation Parking Bay chu siam mek a nih thu pawh a sawi a, 70% physical work zawh tawh a nih thu sawiin, heng bakah hian Runway Extend, Night Landing Facilities, Runway Side Strip tihlen leh a dangte pawh hmachhawp ah neih a nih thu a sawi bawk.
Lengpui Airport-ah hian Scheduled Airline Service a lo pun belh zel avangin tumkhata thlawhnaa tam zawk Park theih nan Apron chu tihlen tum mek a ni tih Chief Minister chuan sawiin, hna chanve vel zawhfel a nih tawh thu a sawi a, “Siam zawh hunah chuan tuna Apron a Thlawhna ding thei zat pali hi pariat-ah a chhoh beisei a ni,” a ti a. Lengpui Airport-a Navigational leh communication tihchangtlun nan Hmunpui tlang-ah DVOR khawl dahbelh tura hmalak mek a nih thu leh installation chu March, 2020-a zawhfel hman beisei a nih thu a sawi a, he khawl hi hman theih a nih hunah chuan Lengpui chunga Domestic leh International Flight zawng zawng ten an hmang tangkai hle dawn niin a sawi bawk a. Lengpui Airport-a Air Traffic Control (ATC) leh Fire Station te chuan duhthu an sam tawh lo tih pawh sawiin, ATC atang hian Runway pum a hmuh theih loh tih a sawi bawk a, “Heng te avang hian ATC leh Fire Station te hi Building pakhat a inkawpin sak that tum a ni,” a ti.

Comments

Chhiar Hlawhte