Serchhip-ah MCPA General Conference neih a ni

Mizoram Civil Pensioners Association (MCPA) District Hqrs. Serchhip chuan nimin khan General Conference neiin an pawl hruaitu thlanna an nei.

Serchhip Hmar Veng YMA Hall-a Mizoram Civil Pensioners Association (MCPA) District Hqrs. Serchhip General Conference hi an pawl President, H. Lalliana chuan kaihhruaiin he hun khuallian nia hmanpuitu MCPA General Hqrs. President, Lalthansanga chuan MCPA member te chu an thatlai hun te ram leh hnam tana lo hmang tawh an nih thu sawiin, chuvang chuan mahni insit lo turin a chah a. MCPA member te tana an hmalakna hrang hrangte sawiin, tuna hmachhawp hrang hrang an la neih te pawh a sawi a. Ani bakah hian MCPA General Hqrs. atanga hruaitu dang rawn kal te pawhin thu an sawi bawk.

MCPA District Hqrs. Serchhip General Conference ah hian an pawl Secretary, C. Lalbiakthanga leh Treasurer, RL. Sangliani te hnen atangin report ngaihthlak a ni a, kum 2018 hnu lama an member boral mi 44 te sunna hun hmangin an pawl hmalakna hrang hrangah zawhna leh chhanna hun hman a ni a, General Hqrs. hruaitu ten zawhna te hi an chhang a ni.

Kum 2020-2022 chhunga an hruaitu tur thlanna neih ah President atan H. Lalliana (New Serchhip), Vice President-ah R. Chhuan-thanga (Chhiahtlang) leh Treasurer-ah RL. Sang-liani (Serchhip) te thlan an ni.

Mizoram Civil Pensioners Association (MCPA) hi April 1, 1999 khan Serchhip-ah din tan niin a tirah chuan Branch din a ni a, hemi hnu hian District-ah hlangkaiin tunah hian Branch 10 awmin member 737 an awm mek a, Life Member mi 5 an awm mek bawk a ni.