Bungrua leh thil man ti sang lo turin ngenna siam

Serchhip District Consumers Association chuan Serchhip leh a chhehvel-ah bungrua leh dawr thil a man pangngai aia to-a zuar hria chuan an hnenah emaw, thuneitute hnenah emaw hriattir turin an ngen.
Hemi chungchanga nimin a thu-chhuah an siamah Serchhip District Consumers Association chuan tunlaia khawvel ina an buaipui Corona Virus vangin Mizoram hmun thenkhatah sumdawng leh dawrkai ten mipui ah an bungrua a man pangngai aiin an hralh to ni a hriat a ni tih tarlangin, hei hi Consumer Association chuan pawi an ti hle tih an tarlang a.
Hetianga bungraw man tihsan hi sawrkar dan kalh a ni tih tarlangin, hei vang hian Serchhip District huamchhunga dawrkai leh sumdawng te chu an bungrua te hemi denchhena tito leh tisang lo turin Serchhip District Consumer Association te chuan an ngen a, hmaikawr (mask), kut silfaina (hand sanitizer), buhfai, chini, tel, chawhmeh leh nitin mamawh thil te a man pangngai aia tisang lo turin sumdawngte an inngen bawk.
Hei bakah hian mipui lam te pawh tumah chi-ai lo tura ngenin, thu lengvak avanga buai phili mai lovin sawrkar thuchhuak ngaichang zawk tura ngenin, fimkhurna tur hrang hrang sawrkarin a tarlanah te kan fimkhur a tul bawk tih an tarlang a. Serchhip leh a chhevela bungraw/dawr thil a man pangngai aia to a zuar te chuan H. Zonuntluanga, President District Consumer Association Ph. No. 8415968536, Johny Zonun-mawia, Inspector Legal Metrology Ph 9366363296, Sarah Laldintluangi, Asst. Director Food & Drugs Serchhip Ph 8413936387 leh Laldinpuia, Secretary District Consumer Association Ph. 9089284538 te hnenah hriattir turin an ngen bawk.
Hetihlai hian nimin chawhnu lam khan Serchhip Bazar-a Buhfai zawrhna dawr lian deuh deuh ah chuan Buhfai hi lei tur awm lovin a zo vek tawh thung a. Nizan lama buhfai rawn thleng tura beisei tlem a awm bawk.

Comments

Chhiar Hlawhte