KTP General Conference vawi 58-na Serchhip-ah tluang taka zawhfel a ni ta

Serchhip P&E Veng Leisekawt Mual-a KTP General Conferencer vawi 58-na neih chu nizan khan a tiak a, he khawmpui hmanga rawn kal Palai te chuan Vawiin hian Serchhip chhuahsanin mahni khaw lam an pan hlawm ang.
February ni 27 zan atanga neih Mizoram-a thalai punkhawmna lian ber, KTP General Conference vawi 58-na ah hian Inrinni khan Central KTP hruaitu thlanna leh Rorelna chu Serchhip Kawnpui Kohhran Biak In-ah neih niin kum 2020-2021 chhunga Central KTP hruaitu tur thlanna neih a nih hnuah hruaitu tur ten chanvo insiam felin Leader-ah Rev. Vanlalmuanpuia Khiangte (Synod thlan); Assistant Leader-ah Rorelkima, Ramhlun Bial; General Secretary-ah T. Upa Rochungnunga (Synod ruat); Assistant Secretary-ah T.Upa Malsawmtluanga, Mission Vengthlang Bial; Treasurer-ah PC. Lalrinsanga, Dawrpui Bial leh Finance Secretary-ah Upa Lalrinmawia Ralte, Khatla Bial te niin Aizawl khawpui chhunga Pastor Bial KTP te atangin Central KTP Committee Members tur mi 21 ruat thar an ni bawk.
Inrinni-a KTP General Conference Rorel Inkhawm-a an thurel zingah hian HIV/AIDS darh zel tur venna kawngah chak zawka hmalak chhunzawm te, Youth Recreation Centre (YRC), Chhawmdawlna pual leh Hospital Charity Fund pual-a rampum huapa thawhlawm lakkhawm leh rampum huapa ram tana chawnghei tawngtai rualna neih te relin Ram, khawtlang leh Kohhran-a thalaite pawimawhna inzirtirna buatsaih te an rel a. Kum 2020 Central KTP Kumpuan thupui atan ‘Kristian Chhungkua’ (Josua 24:15) tih chu thlan a nih bakah kum 2020-2021 Budget atan Rs. 20,87,000 (KTP pual bik budget head) leh Synod atanga KTP puihna Rs. 39,19,000/- nen belhkhawmin Rs. 60,06,000/- chu pawm a ni bawk.
Kumin a Serchhip in KTP General Conference a thlen rawn hmang tur hian hriat theih chinah palai inziaklut mi 20,801 awmin Motor 4534 zet rawn kal a awm bawk a. Heng bakah hian lehlang-a khawmpui rawn hmang, Counter-a inziaklut pawh tam tham tak awmin kum 2022 KTP General Conference chu Kolasib-ah neih a ni dawn a. Kum 2024 KTP General Conference chu Ngopa-ah neih tura rel a ni bawk.

Comments

Chhiar Hlawhte