MZP in Chief Minister hnenah thu pawimawh an thlen

MZP General Hqrs. hruaitute chuan nimin khan Chief Minister, Zoramthanga chu kawmin thil pawimawh hrang hrang an sawipui.
Nimin-a Chief Minister Pisa-a MZP General Hqrs. hruaitu ten Chief Minister an kawmna hunah hian MZP chuan Tripura State sawrkar hmalakna a Zampui Tlangdung-a Mizo awmte dipdal tur zawnga Tuikuk raltlante dah tum mek chu thalo an tih thu sawiin, heng kan unaute himna tur leh thlamuan tur hian rang taka Zampui tlangdung-ah Police Outpost dah tul an tih thu leh Chawngte khuaa IR Batallion dah a pawimawhna te an sawi a. Chief Minister chuan Zampui tlangdung-a Mizote thlamuan turin Police dah an nih tur thu leh Chawngte hmuna IR dah chu Mizote tana thil pawimawh tak, hnamdang huangtau lutuk tur venna atan thil tul anih angin Home Minister nen an lo sawi dun nghal tur thu a lo sawi a ni.
Hei bakah hian MZP chuan Bairabi Zophai hmuna Mosolman Biak In sak chhunzawm tura bungrua leh tul ang lakkhawm mek te titawp turin Chief Minister chu ngenin Chief Minister chuan rang taka tihtawp anih theih nan hmalak nghal anih tur thu a sawi a. June 30-a Remna Ni lo thleng tur chu Mizote tana remna leh muanna a hlutzia kan hriatzel theihnan uar taka hman tul an tih thu pawh MZP hruaitute chuan sawiin, Chief Minister chuan Remna Ni chu Mizote tan ni pawimawh leh chhinchhiah tlak a ni tih a sawi a. Kumin hian ropui taka a lawmna Mizoram sawrkar leh MZP ten rampum anga buatsaih turin Committee te din a nih tur thu a sawi bawk.
Heng bakah hian MZP chuan Lok Ayukta thuam chak a ngaih thu leh hnathawk thei tura sum leh pai pawh tun aia pe tam turin Chief Minister chu an ngen a. Kum 2002 atanga kum hnih dan-a Zohnam khawmpui - Zofest an lo buatsaih thin chu kumin-a hman leh chungchang bakah Mizoram leh Manipur State inunauna a that lehzual nan Helicopter service chungchang pawh Chief Minister hnenah hian an thlen a, Chief Minister chuan Helicopter service chu sawrkar pawhin a ngai pawimawh tih sawiin, a hmun tur leh tul ang pawh lo bawhzui a, Helicopter Service anih theihna turin hmalak a tum thu a sawi a. MZP ten Zofest an buatsaih thin chu tha a tih thu pawh sawiin, kumin 2020-a Zofest hlawhtling tak neih anih theihna turin Sawrkar anga tih ve theih awmte chu Mizoram sawrkar in a ti ve ang tih a sawi bawk.

Comments

Chhiar Hlawhte