MSSSB Chairman thar Office zawmlo turin ngen

Mizo Students’ Union (MSU) chuan Mizoram sawrkarin Mizo-ram Subordinate Service Selection Board (MSSSB) Chairman atana ruat thar chu Mizo thalai hna zawng mek leh zirlaite hlauhthawnna tireh turin a Office zawm lo turin an ngen.

Mizo Students’ Union (MSU) hruaitute chuan nimin khan Aizawl Press Club-ah thuthar thehdarhtute kawmin Mizoram sawrkarin Mizoram Subordinate Service Selection Board (MSSSB) dinna tur June ni 10, 2019-a pass anih atanga Vawiin thlengin a enzuiin a thlithlai reng tih an sawi a, Mizoram sum leh pai dinhmun ngaihtuah chungin MSSSB din kher aia MPSC tihlen pawh a tha zawk nia an ngaih thu te pawh thuchhuah siama an tarlan thu leh chuti chunga sawrkarin MSSSB din anih tur thu a pass takah chuan Central-a UPSC leh SSC in felfai taka hnalak an kalpui anga kalpui anih theihnan MSSSB chu Mizo thalai hna zawng mek leh zirlaite hmakhua ngaia party induhsakna hleihluak a awmlohna tur atan Board enkawltu ruat kawngah sawrkar chu fimkhur taka kal turin MSU chuan ngenna a siam leh thu an sawi a.

Chuti chunga February ni 24, 2020-a MSSSB Chairman atana Political Party a Adviser ni thin ruat a ni leh ta mai chu MSU chuan thlalai leh zirlaite rilru thlir chungin a hrethiam lo hle tih sawiin, Mizoram Sawrkar lo enkawl tawhtu hrang hrang te’n MPSC enkawl tura Party mi an dah thin avang khan party mi leh sa atangin induhsakna kawngah innawrna a awm thin thu leh chu chuan thalai hna zawng mek leh zirlaite ah hnualna a thlen thin avangin MSU chuan a duhlo takzet tih an sawi a. MSSSB-ah chuan hetiang anga thalaite leh zirlaite hlauhthawnna thil hi a awmlohnan leh a thlen tawhloh nan vawi tam tak MSU chuan sawrkar-ah ngenna a lo siam tawh thu pawh sawiin, a tir atanga zirlaite hmakhua ngai chunga thutlukna siam tura an lo ngen tawh chu tihhlawhtlin a nih loh avangin Sawrkar in Mizo thalaite a ngaihthahna ah an ngaih thu an sawi a. Hei vang hian Mizo thalai leh zirlaite thlavang hauhin a tawp thlenga MSU chu kal a tum thu sawiin, MSSSB Chairman atana ruat thar chu Mizo thalai hna zawng mek leh zirlaite hlauhthawnna tireh turin a Office zawm lo turin an ngen tih an sawi bawk.