Bomb hmanga Aizawl beih hriatreng nan MZP huaihawtin ‘Zoram Ni’ hman a ni

Kum 1966-a India sawrkarin Bomb hmanga Mizoram a beih ni, March 5 hriatrengna atana MZP in 'Zoram Ni' an hman chu nimin khan hman leh niin Aizawl-a Zoram Ni puala hun hman chu Supply Minister, K. Lalrinliana chuan khuallian niin a hmanpui a ni.

Aizawl Chanmari YMA Hall-a Zoram Ni hmanna ah hian Supply Minister, K. Lalrinliana chuan Mizote hi Lal neiin kum 200 vel zet chu mahnia ro inrelin kan lo awm tawh tih sawiin, kan ram hauh chin pawh lu chhum ban chhum huama hauh thin kan ni tih a sawi a. Kum 1958-a Mautam lo thlen khan, khatih hun laia India khan a khua leh tui-a min pawm tak tak lohzia a tilang chiang hle tih sawiin, “|ampui mitthi kan tawrh lai pawhin India sawrkar chuan min ngaihsak tawk lo hle a nih kha. Hei vang hian Mizo Hnam tan kum 1961-ah MNF chu Pu Laldenga hovin din a lo ni ta a, Independence Movement chu a lo chhuak chho ta a ni,” a ti a. Zoram Ni chu March 5, 1966-a India sawrkar (Indian Air Force)-in Mizote (Aizawl leh a chheh vel khua-Tlabung, Hnahthial) bomb hmanga a beih ni hriatrengna leh thang leh tharte ah chi anga Mizo Nationalism tuh ngheha a awm theih nana hun hman thin a ni tih sawiin, “Hei hi India History-ah India sawrkarin a khua leh tui te Thlawhtheihna leh bomb hmanga a beihna awmchhun a ni,” tiin kum 2008 atangin he Ni hi Zoram Ni atana hman a nih thu a sawi bawk.
Supply Minister chuan Indian Air Force thlawhtheihna in ‘Aizawl a rawn bomb lo’ ti pawl an la awm leh, ‘MNF-in Zalenna a sual lo’ ti pawl an la awm chu a vanduaithlak tih pawh sawiin, “Dawt an sawi a ni,” a ti a. “He ni kan hman chhan chu Zofaten nasa takin kan tuar a, chu kan tawrhna chu a thlawn lo a, kan hnam pasaltha te thisen avangin thangtharten nun nuam zawk kan neih phah a ni tih kan hriat reng theih nan leh Zofate kan inunau a, inngeih tlang taka awm a, khawvel miten hnam huaisen leh hnam intodelh tia min hriat theihna tura rim taka ram leh hnam tana thawhrim inzirtirna tur atan te, mahni hnam hmangaih tura inkaihhruaina atana hman thin a ni,” a ti a. He Ni-ah hian kan hnam pasaltha leh martar-te kan hre reng tur a nih thu leh thangthar te thinlung-ah ram hmangaihna neih tir se a duh thu a sawi bawk.
Nimin-a Zoram Ni puala hun hman hi MZP Vice President, Peter Chhangte chuan kaihruaiin Professor JV. Hluna ziak, 'Immage on Aizawl Bombing' tih chu MZP President, B.Vanlaltana chuan tlangzarhin Zoram Ni lo pian dan te a sawi bawk a. PUC-a Associate Professor, Lalthlamuana Ralte chuan Nationalism inzirtirna hun a hmang bawk a ni.

Comments

Chhiar Hlawhte