MoU ziah tawh, hnathawklo te tihtawp tum a ni

Power & Electricity Department changtu Minister, R.Lalzirliana chuan Hydel Electricity Project atana sawrkarin MoU a sign pui tawh, engmah thawk silo te chu MoU tihtawp vek tum a nih thu a sawi.

Nimin a Assembly inkhawm ah Eptu Member, Lalchhuanthanga zawhna chhangin Power Minister, R. Lalzirliana chuan Mizoram sawrkar leh NTPC ten Kalodyne Stage-II Hydro-Electric Project hnathawk tura Memorandum of Understanding an ziak anga NTPC lamin hma an lak loh avangin MoU chu tihtawp a nih loh nachhan tur ziaka thehlut tura hriattir an nih thu leh an chhanna nghah mek a nih thu a sawi a. NTPC te hian inremna anga an tih turte tihpuitlin an neih loh thu leh he Project-in power a siamchhuah tur chu Rs. 11/- per Unit-a leitu tur an hmuh loh thu an sawi thu sawiin, “He Project hi hlawhtling taka thawh theih a nih an ring lo bawk a ni,” a ti.

Opposition Group Leader, Lalduhoma chuan hei bakah hian Hydel Project lian 9 sawrkar in MoU siampui a neih thu leh a thente chu kum 10-a upa te ni tawhin, zawh hun pel vek tawh a nih bakah an thawk lo vek bawk tih sawiin, tihtawp-a a thar-a Agreement siam tumna a awm em tih zawtin P&E Minister chuan, Hydel Power Project lian 9-a MoU sign pui tawh, hna la thawk si lo te chu tihtawp vek tuma hmalak a nih thu a sawi a, zawhna dang chhangin MoU Cancel chungchangah Court lama zualko mai theihna a nih avanga fimkhur taka hmalak a nih thu a sawi bawk.