Mizoram State Health Care Scheme sum chungchang House-ah sawiho a ni

Health Minister Dr. R Lalthangliana chuan Mizoram State Health Care Scheme Corpus Fund chu Finance Department enkawl a nih thu Assembly House hrilhin, Chief Minister Zoramthanga chuan kumin ah Health Care Scheme atan cheng vbc. 10 dahin mamawh dan ang zelin pek zel theih tum a nih thu a sawi bawk.
Mizoram Legislative Assembly Budget Session neih meka nimin-a zawhna leh chhanna hunah Health Minister, Dr. R. Lalthangliana chuan Finance Department-in Corpus Fund a enkawl avangin Bank-a pawisa dah chungchang pawh an hriatpui loh thu a sawi a, hetihlai hian sum an mamawh ang te chu Finance-in an pek thin thu a sawi a, Finance Department-in hlawkna a hmuh tam theihna turin Bank rintlak ngeiah pawisa an dah ngei a rin thu a sawi. Dr. R. Lalthangliana chuan, HIV/AIDS do kawnga hmalakna turah pawh tunhma atanga Budget head-a a hming chauha sum dah thin chu Chief Minister-in Budget thar-ah la pawhkhawm turin cheng nuai 770 a dah sak tih sawiin, lawmawm a tih thu a sawi a ni. Health Minister chuan, kum 2018 December thla-ah Health Care Scheme Corpus Fund-ah Rs. 1,55,56,71,000 a awm tih sawiin, kumin January thl-aah Rs. 2,05,56,71,000/- a awm thu a sawi a, kum 2018 December thla hnuah Health Care Corpus Fund cheng vbc. 50 chu Bank 3, Yes Bank-ah vbc 20, Khatla-a Mizoram Rural Bank-ah cheng vbc. 15 leh Chanmari MRB-ah cheng vbc. 15 te dah belh a nih thu a sawi bawk.
Health Care Corpus Fund chungchang hi Chief Minister, Zoramthanga chuan sawifiahin thuneihna an chan hmasak hun laiin ramchhung ah Health Care kalpui an hriat vak loh laiin Mizo-ram-ah Asia Development Bank atanga sum puk hmangin bul tan a nih thu a sawi a, hetihlaia pawisa an dah chu hman loha awmin kum 10 chhung dah belh lohin a awm tih a sawi a, tuna thuneihna an chan hnu hian Corpus Fund-ah cheng vbc. 150 vel awmin, nikum-ah cheng vbc. 50 dah belh a nih thu leh a vaiin cheng vbc. 200 chuang a awm ta tih a sawi a. Bank hrang hrang pawisa dah chu Healh Care Society hminga dah a nih a rin thu pawh sawiin, nikum-ah sum an hman tam loh avangin kuminah cheng vbc. 10 an dah tih a sawi a, hetihrual hian mamawh dan ang zelin pek zel theih tum a nih thu a sawi bawk.

Comments

Chhiar Hlawhte