Kawngchhawng siamna turin DPR emaw, thil dang emaw siam ala ni lo - Chief Minister

Chief Minister, Zoramthanga chuan kawngchhawng siamna turin DPR emaw, thil dang emaw siam ala ni lo tih Assembly House a hrilh.

Nimin a Assembly inkhawm zawhna leh chhanna huna Vaivakawn leh Bawngkawn-a Fly Over siamna tur leh Chaltlang-a Inter State bus Terminal siamna tur chungchang a sawifiahna ah Chief Minister, Zoramthanga chuan, kawng chhawng siamna tur chu mithiam zawk te nen hmalak ala ni dawn tih a sawi a, kawngchhawng chu Chanmari leh Kulikawn inkara siam chu a awlsam a rin thu sawiin, Bawngkawn thleng tur erawh chuan a plangtlang turah harsatna a awm a rin thu a sawi a, kawng chhawng siam turah hmun remchang apiangah chhuahna leh luhna siam tum a nih thu a sawi a, hotu thenkhatin Chanmari-a chuang kha a laiah pawh chhuk duh ila Kulikawna chhuk tho a ngai ang tia nuihza siamna atana an hman ang chu a ni dawn lo tih a sawi bawk.

Chief Minister chuan, Vaivakawn leh Bawngkawn Fly Over leh Chaltlang-a Inter State Bus Terminal siam an tumna ah tihfuh tawkloh an neih thu pawh a sawi a, a tira DPR siamtu ten Feasibilty Report an pek chu a fel tawk lo a, Ministry lamin an pawm thei lo tih a sawi a, hemi avang hian an hmalakna a hnufum phah thu a sawi a. Feasibilty Report siam hmasatu Consultancy Firm te chu an inhnukdawk tawh a, Consultancy Firm tha nia hriat chu Feasibilty Report siam tura rawih leh an ni tih sawiin, Fly Over 2 siam tur te chu kawng chhawng nen inzawm remchang tura design vek a nih thu a sawi bawk.

Hemi chungchanga zawhna UD&PA Department changtu Deputy Chief Minister, Tawnluia'n a chhanna ah Vaivakawn leh Bawngkawn Fly Over leh Chaltlang-a Inter State Bus Terminal siamna tura atan NPEC in Feasibilty Report a siam chu Ministry lamin a pawm theih loh avangin an inhnukdawk tih a sawi a, a hnuah Ministry pawmpui Consultancy firm, TCIL chu rawih leh a nih thu sawiin, an ni hian Project pathum tan hian hma an lak nghal thu a sawi a. Fly Over chu ‘Kawng Chhawng’ tia sawi theih a nih thu leh Traffic Jam ti ziaawm tura ruahmanna tam tak a awm thu leh cheng vbc. 1993 man tur Cable Car (Ropeway) a tel thu a sawi bawk.