Mizoram Cancer Care Foundation dincham lawm a ni

Mizoram Cancer Care Foundation (MCCF) chuan nimin khan an dincham vawi 9-na chu Mizoram State Archives Hall, Aizawl-ah nei a, he hun hi Deputy Chief Minister, Tawnluia chuan khuallian niin a hmanpui.
MCCF dinchampha lawmna ah hian Deputy Chief Minister chuan Cancer vanga natna leh hrehawm tam tak tuarte leh Cancer vanga thihna tawk chhungkua Zoram dung leh vanga mite a tawrhpui thu sawiin, Cancer in mihring nunna a suat mek avangin nunphung hrisel, eitur thianghlim leh zuk leh hmuam tih loh te inzirtirna leh inhrilh hriatna uar leh zuala kalpui a ngai a ni, tiin a sawi. Hriselna leh ram hmasawnna a inzawm avangin hriselna ngai pawimawh hmasa tura inzirtirna, a bikin sikul naupangte ah uar leh zual ni se, tiin a sawi.
Deputy Chief Minister chuan Mizoram Health Care Scheme hnuaiah pawh Cancer vei te chu ngai pawimawh bikah dah a ni tih sawiin, Cancer veite enkawlna tur institute tha zawk pawh sawrkar hmalakna in ruahmanna siam mek a ni tih a sawi a. Tun dinhmuna Cancer veite enkawlna tur khawl tha pawh Chief Minister hriatpuina in lei a ni dawn tih a sawi bawk.
Mizoram Cancer Care Foundation (MC-CF) hi Cancer natna tuar te intelkhawmna pawl niin Office Bearer 8, Adviser 6, Committee Member 22 awmin, Evangelical Sub-Committee din a ni a, MCCF-ah hian member 1040 an awm mek a. Sum hmuhna hi Membership Fee Rs. 200 leh donation an hmuh atangin a ni ber a. Thla tin Inrinni vawi 3-na ah Faith Ministry inkhawmna hmunah (K.Sapsanga Building) inkhawmhona an nei thin a. Zemabawk Cancer Hospital-ah pawh inkhawmna leh sharing kartin an nei ho thin bawk a ni. Damlo te pualin tawngtaina leh eitur theih ang ang, a remchang apiang kengin damlo te tlawhin hun an hmang thin a ni.

Comments

Chhiar Hlawhte