Mizoram-ah COVID-19 vei hmuhchhuah la awm lovin Ei leh bar-ah mipuite chi-ai lo turin ngen an ni

Novel Coronavirus darh zau zel lakah Mizoram leh hmarchhak State dangte kan la him a. Mizoram-ah he virus hi a lo luh lohna turin Mizoram Sawrkar chuan tan a la mek zel a. Hetihlai hian Food,Civil Supplies & Consumer Affairs Department chuan thuchhuah siamin ei leh bar leh nitin mamawh chungchangah tumah chi-ai lo turin an ngen.

Mizoram Chief Secretary kaihhruai State Level Task Force on Mitigation of Coronavirus (COVID-19) chu nimin khan Aizawl SP Conference Hall-ah Chief Secretary, Lalnunmawia Chuaungo kaihhruaia thukhawmin Chief Secretary chuan he virus hlauh avanga mipuite chi-ai lo turin a chah a. Tun thlengin Mizoram mipuite zingah emaw, Mizoram rawn tlawhtute zingah he natna hrik pai hmuhchhuah an la awm lo tih sawiin, mipui nitin mamawh khaihlak mai tur anga thuthang pawh thu belhchian dawllo a ni tih a sawi a. Mipui mamawh Buhfai, Gas, Petrol leh Diesel te pawh Stock a tam tawk a, heng mamawh thil te hi chatlak lova lakluh zel a nih avangin harsatna tur a awm lo tih sawiin, Buhfai phei chu thla thum (3) tla Mizoram chhung kudam-ah dah khawl sa a awm tih a sawi a, mamawh phurtu motor-te pawh chatlak lovin Mizoram-ah a lo thleng reng tih a sawi bawk.

State Level Task Force on Mitigation of Coronavirus (COVID-19) thukhawm chuan tul bik thilah tih loh chuan mipuite Mizoram pawna zin chhuak tlem turin thurawn a pe a. Sawrkar Department zawng zawngte puipunna lian tham – Conference, Kut leh thildangte siam rih lo turin a ti a. Kohhran leh pawl dangte pawh hun engemawti chhung chu a theih chin chinah inkhawmpui liantham ko rih lo turin a ngen bawk.

Myanmar leh Bangladesh ramri-ah Zokhawthar leh Kawrpuichhuah tihloh inkalpawhna hmundang zawng zawng chu thu leh awm hma chu khar a ni a. Ramri kan-a kal an awm lohna turin Assam Rifles te leh Mizoram Police te leh a khaw mipuite tangtlangin venna hna an thawk dawn a ni. Zokhawthar leh Kawrpuichhuah te hi venhimna hna thawktuten englai pawhin an thut-chilh anga, ramri kan-a lolut ten he natna hrik hi an pai em tih uluk taka endik hna medical team ten an thawk dawn bawk a ni.

Lengpui Airport-ah pawh zin veivakte endik hna hi uluk taka kalpui a ni a. He natna vei nia rinhlelh te chu Lengpui Tourist Lodge-ah dah hran an ni anga. Tripura leh Mizoram inrina Kanhmun-ah te, Assam ramri Vairengte leh Bairabi bakah Manipur ramri Khawkawn-ah te inkalpawh theih a ni dawn a. Heng hmun ruatbik te tih loh State thenawmte nena inkalpawh theihna hmu dang zawng zawng chu venhimna khauh tak nen khar vek a ni.

Transport Department kaltlangin Mizoram pawna kal tur te leh Mizoram chhunga Maxi Cab emaw, Bus emaw hmanga zin veivak te chu an hming, kum, address leh phone number chiang taka chhinchhiah vek a ni dawn a. Heng zin veivakte zingah hian COVID-19 vei hmuhchhuah an awm palh thulhah an chuanpuite leh an mi hmuhte chhui zui awlsam theih nana ruahman a ni. Ramdang mi (foreigner)-te chu thu leh awm hma chu Mizoram-ah lut rih lo tura tih an ni bawk.

Hetihlai hian nimin khan Mizoram Sawrkar Food,Civil Supplies & Consumer Affairs Department chuan thuchhuah siamin ei leh bar leh nitin mamawh chungchangah tumah chi-ai lo turin an ngen a. Tun dinhmunah FCS&CA Department Godown hrang hrangah buhfai quintal 1,68,569.73 a awm mek tih sawiin, FCI Godown-ah quintal 1,59,028.20 a awm bawk a, hei hi Mizoram in buhfai a mamawh thla thum (3) daih vel a ni tih tarlangin, mipuiin harsatna an tawh loh nan tunkar chhung ngeia Retailer ten buhfai an sem theih nan department in ruahmanna a siam mek bawk tih an sawi a. Hei bakah hian Petrol leh Diesel bakah eirawngbawlna Gas-ah pawh harsatna awm lovin kawng laka rawn kal mek pawh thahnem tak a awm thu an sawi bawk.