Health Minister in sawrkar inpuahchahna a puang

Health Minister, Dr. R. Lalthangliana chuan nimin tlai khan a Pisa-ah thuthar thehdarhtute kawmin Coronavirus leng mek chungchanga sawrkar inpuahchahna hrang hrangte a hrilhfiah.

Thuthar thehdarhtute a kawmna hunah hian Health Minister, Dr. R. Lalthangliana chuanhe hri leng avanga ramdang nen-a inrina te khar a nih thu sawiin, tullo a mipui te chi-ai chiamna tur a awmlo tih a sawi a, khawvel in a buaipui mek anih avangin sawrkar angin fimkhur taka kalpui angaih avangin tunah hian sawrkar chuan fimkhur tak leh uluk takin he hrileng mek ven chungchang ah hian hma ala tih sawiin, Chief Minister hova sawihona an neih tawh ah sawrkar in hma a lakna tur atan sum ruahman pawh tunah dahfel nghal anih thu Health Minister chuan a sawi a, Coronavirus rinhleh test na tur khawl Mizoram in kan neih loh pawh atul anga bawhzui a neih tum a ni, a ti bawk.

He hunah hian Coronavirus chungchanga hmala turin State Level Task Force on Covid19 Committee din anih thu Chief Secretary, Lalnunmawia Chuaungo chuan sawiin, tuna Mizoram in International border kan neih a inkalpawhna kan neih zawng zawng pawh khar nghal a ni dawn tih a sawi a. A bikin Myanmar atanga luhna, Zokhawthar chu uluk lehzuala endikna kalpui ani dawn tih Chief Secretary chuan sawiin, a tul bik leh pawimawh tak anih loh chuan inkalpawh a theih dawn lova, Zokhawthar ah hian nitin darkar 24 chhung Medical Team an duty anga, Police te nen tanghoin fimkhur takin kalpui ani dawn tih a sawi. Hei bakah hian Bangladesh lama inkalpawhna kawngte pawh fimkhur taka ven anih tur thu sawiin Lalnunmawia Chuango chuan, Inter-State Border kan neih mek te pawh tun dinhmun ah chuan a nazawnga inkalpawh a remdawnlo a, Tripura ramri-ah Kanhmuh, Manipur ramri-ah Khawkawn leh Assam lam atanga luhna Vairengte leh Bairabi-ah te check point siamin pawimawh leh tul bik thila lut turte chauh lo chu Mizoram an luh phal a ni dawn lo a, hetah hian Medical Team ten endik hna uluk takin an kalpui dawn tih a sawi bawk.

Mizoram sawrkar chuan Coronavirus chungchang ah sumdawng thenkhat ten thil man tihto an tum emaw, an lo hralh to emaw anih chuan Sawrkar in a enzui anga na takin hma anla dawn tih Chief Secretary chuan sawiin, Social Media lama thuthang diklo emaw, fiamthu diklo zawnga thehdarh emaw an awm anih pawhin sawrkarin uluk taka enfiah in hetiang thildiklo zawnga vawrh darhtute chu man chhuakin na takin hma an la dawn tih Chief Secretary chuan thuthar lakhawmtute hma ah a sawi a, Coronavirus chungchang ah hian sawrkar in thuchhuah mumal taka a siam anih loh chuan mipuite chi aia lo a, sawrkar thu leh hla ngaihchang turin Zoram mipuite a sawm bawk a ni.