MBOCWWB sum pekchhuah dan hre lo

Labour, Employment, Skill Development & Entrepreneurship changtu Minister, Lalchhandama Ralte chuan Mizoram Building & Other Construction Workers Welfare Board sum MUP tan leh Concert na atana pekchhuah awm nia sawi chungchangah sum an pekchhuah dan a hriat loh thu House a hrilh.
Nimin-a Assembly rorel inkhawm zawhna leh chhanna hunah Labour, Employment, Skill Development & Entrepreneurship changtu Minister, Lalchhandama Ralte chuan, sum pek dan hi Administrative Cost atang engemaw remchang pe nge an nih tih a hriat loh thu a sawi a, sum pekchhuah theih dan chu chi hrang hrang a awm thu sawiin, Trade Union te pawh Awareness Campaign buatsaihna tur pekchhuah thin an ni tih a sawi a, sawrkar hmasa hunlai atangin thawnthu ngaihnawm tak a awm thu sawiin, lehkha pawimawh bo then anga lang a awm avangin an fimkhur hle tih a sawi a, member ten a hmunah enho an duhna chu engtiklai pawhin tha a tih reng thu a sawi a. Labour ten an chanvo an chan ngei chu sawrkar duhdan a ni tih a sawi bawk.
Minister chuan Mizoram Building & Other Construction Workers Welfare Board-a inzia lutte chu an fate zirna senso phuhrukna tur te, damdawi-a inenkawlna senso te, ramtuileilova an awma chhawmdawlna te, an luman te, nupui pasal inneih tanpuina te, nau neih tanpuina te leh pension ang chi te pek theih an nih thu a sawi a. Kum 2018 December atanga kumin January inkar chhungin Labour Cess Rs. 27,13,29,386/- hmuh a nih thu leh hemi hun chhung hian Rs. 28,22,44,951/- hman ral a ni tawh thu House a hrilh bawk. Minister in zawhna a chhan zawh hnu hian Speaker, Lalrinliana Sailo chuan he thil hi a hriat chian thu leh Labour te chanpual tur pawisa chungchanga buaina awm chu pawi a tih thu sawiin, sawrkar hmasa ah Minister leh MYC Chairman in an banphah thu a sawi a, a changtu Minister chu en ngun turin a ngen bawk.

Comments

Chhiar Hlawhte